Sarapshylar ulttyq mádenıetti saqtap qalý máselesin talqylady
ALMATY. QazAqparat - Almatyda Qazaqstan Respýblıkasynyń Tuńǵysh Prezıdenti - Elbasy Qory janyndaǵy Álemdik ekonomıka jáne saıasat ınstıtýtynda (ÁESI) «Jahandyq básekelestik jaǵdaıyndaǵy qazaqstandyq mádenıet: kútiletin nátıjeler men shynaıy kórinis» taqyrybynda dóńgelek ústel ótti, dep habarlaıdy QazAqparat tilshisi.
Pikirtalasqa R.B. Súleımenov atyndaǵy Shyǵystaný ınstıtýtynyń bas ǵylymı qyzmetkeri Shaızada Toqtabaeva, T. Júrgenov atyndaǵy Qazaq ulttyq óner akademııasynyń «Tarıh jáne beıneleý óneri teorııasy» kafedrasynyń professory Olga Batýrına, «Almaty - Dom Mıra» art agenttiginiń dırektory Dına Dýspýlova, ıÝNESKO sarapshysy Evfrat Imambek, rejısser-horeograftar Gúlmıra jáne Gúlnar Ǵabbasovalar, ónertanýshy Gúlzada Omarova, ál-Farabı atyndaǵy QazUÝ fılosofııa jáne saıasattaný fakýltetiniń dekany Álııa Masalımova, «Mır Evrazıı» qorynyń jetekshisi Edýard Poletaev, saıasattanýshy, «Alternatıva» ózekti zertteýler ortalyǵynyń dırektory Andreı Chebotarev, saıasattanýshy Marat Shıbýtov sııaqty sarapshylar qatysty.
Dóńgelek ústelge qatysýshylar mádenıet salasyndaǵy jańǵyrý máseleleri men Memleket basshysynyń «Bolashaqqa baǵdar: rýhanı jańǵyrý» atty baǵdarlamalyq maqalasyndaǵy basty tapsyrmalar aıasyndaǵy dástúrli mádenıetti saqtaýdyń qazirgi tetikteriniń nátıjeliligin tilge tıek etti.
«Qazaq mádenıetiniń damýy úshin jan-jaqty qoldaý men barynsha qolaıly jaǵdaı jasaý Qazaqstandaǵy memlekettik saıasattyń basym baǵyttarynyń biri bolyp tabylady. Jahandaný protsesterin tereńdetý jaǵdaıynda dástúrli mádenıetti damytý men saqtaý, onyń ishki jáne syrtqy syn-tegeýrinderge tótep bere alý qabiletin arttyrý erekshe mańyzǵa ıe», - dedi óz baıandamasynda ÁESI Almaty ókildiginiń basshysy Asqar Nursha.
Sondaı-aq sarapshylar Qazaqstannyń mádenı ál-aýqatyn nyǵaıtý, Qazaqstanda jasalǵan mádenı ónimniń básekege qabilettiligin arttyrý jáne memlekettiń jaǵymdy ımıdjin qalyptastyrý úshin sol ónimdi paıdalaný máselelerine de erekshe nazar aýdardy.
Jınalǵandardyń sózine qaraǵanda, Qazaqstandaǵy mádenı kelisimniń biregeı modeli bolyp sanalatyn ulttyq mádenı kod pen eldegi ulttardyń dástúrli qundylyqtaryn saqtaýdy qamtamasyz etý asa mańyzdy.
