Sarapshylar ulttyq kompanııanyń «Halyqtyq IPO» sheńberindegi aktsııasyna suranysty boljaýda
ASTANA. 22 shilde. QazAqparat - Ústimizdegi jyldyń ekinshi jartysynda Qazaqstanda, qazaqstandyqtarǵa iri ulttyq kompanııalardyń aktsııalaryna ıe bolýǵa múmkindik beretin jáne eldegi naryq qoryn damytýǵa baǵyttalǵan «Halyqtyq IPO» baǵdarlamasy iske qosylady,
dep habarlady pm.kz saıty.
«Halyqtyq IPO» baǵdarlamasynyń maqsaty - eldegi iri kásiporyndar aktsııasynyń ıegeri bolý múmkindigin jasaý jáne aktsııalardy tanymal etý. Sonymen qatar, bul qazaqstandyq jeke jáne memlekettik basqa da kompanııalardyń aktsııalaryn shyǵarýǵa múmkindik berý arqyly, qundy qaǵazdar naryǵyn odan ári damytýǵa serpin beredi.
QR EDSM aqparyna qaraǵanda, aǵymdaǵy jyl ishinde Qazaqstanda jurtshylyqqa iri kólemdegi aqparattyq-túsindirý jumystary júrgizilýde, oǵan barlyq respýblıkalyq BAQ, ınternet-resýrstar, áleýmettik jeliler, keńesshiler, borkerlik kompanııalar qatysýda.Sonymen birge, «Samuryq-Qazyna» qory oqý-ádistemelik jáne tanystyrý materıaldary engizilgen bilim berý baaǵdarlamalaryn júrgizýde.
Osy daıyndyq sharalarynyń barlyǵy jurtshylyq tarapynan baǵdarlamaǵa degen qyzyǵýshylyq pen belsendilikti týǵyzyp, aldaǵy ýaqytta áleýetti ınvestorlardyń aktsııaǵa oń suranysyna yqpal etýi múmkin.
Qarjylyq sarapshylar atap aıtqandaı, halyqta «Halyqtyq IPO» baǵdarlamasyny qatysýǵa qyzyǵýshylyq bar, óıtkeni baǵdarlamaǵa jeke ınvestorlar ǵana emes, jarnalyq ınvestıtsııalyq qorlar da qatysady.
Sarapshylardyń aıtýynsha, áleýetti ınvestorlar kez-kelgen qarjylyq naryqta bolýy múmkin táýekelderdi naqty baǵalap, qundy qaǵazdardy uzaq merzimdi ınvestıtsııalaýǵa daıyn bolýlary qajet.
«Qatysýshylar 2-3 aıdan keıin dıvıdendterden túsim alý múmkin emestigin, uzaq merzimge ınvestıtsııalaýǵa daıyn bolý kerektigin túsinýleri qajet. Olardyń salymdarynan túsetin kiris kapıtalızatsııa, paıda, kompanııanyń qarjylyq kórsetkishteri artqan saıyn kóterilip otyrady», - dep atap ótti «ORKEN Invest» atqarýshy dırektory Damır Seısebaev.
Budan basqa, «Halyqtyq IPO» sheńberinde birinshi bolyp ornalastyrylý josparlanyp otyrǵan barlyq kompanııalar ınvestorǵa qyzyqty bolady, sebebi olardyń jaǵdaıy turaqty. «Taǵy bir eń mańyzdy faktor bar, ol - olardyń aktsıoneriniń memleket bolýy», - dep qosty D.Seısebaev.
Óz kezeginde, «BCC Invest» AQ saýda operatsııalary departamentiniń dırektory Ánýar Beısenbıev áleýetti ınvestorlardy bolýy múmkin barlyq táýekelderge daıyndaý kerek dep esepteıdi. «IPO»-ǵa qatysýǵa bel býǵan kez-kelgen adam, memleket IPO-ǵa eń senimdi kompanııalardy shyǵarý arqyly qarjy naryǵyndaǵy jumysqa barlyq qajetti jaǵdaıdy jasaıtynyn túısinýi qajet»,- dedi sarapshy.
Belgili bolǵandaı, osy jyldyń qyrkúıek aıynda «Halyqtyq IPO» baǵdarlamasy aıasyndaǵy birinshi kezeńge «QazTransOıl» AQ aktsııalary ornalastyrylady. «Samuryq Qazyna» qory toby arasynda júrgizilgen saraptama qorytyndysyna qaraǵanda, «QazTransOıl» AQ alǵashqy lektegi kompanııa dep tanylǵan. Іrikteý ólshemderi retinde óndiristik jáne qarjylyq kórsetkishterdiń turaqtylyǵy, álemdik naryq konıýnktýrasyna táýeldiliktiń tómendiligi alynǵan.
«BCC Invest» AQ saraptama basqarmasynyń bastyǵy Ádil Tabyldıevtyń pikirinshe, atalǵan kompanııanyń aktsııalary ınvestıtsııalaýdyń tartymdy nysany bolyp tabylady. «Bul ornalastyrý qunyna da baılanysty, sondyqtan IPO-daǵy aktsııalardy ınvestıtsııalaý týraly sheshimdi ınvestıtsııalyq memorandým men ornalastyrý quny jarııalanǵannan keıin ǵana qabyldaýǵa bolady», - dedi Á.Tabyldıev.
2006 jylǵy IPO ótkizýde tabysty tájirıbe jınaǵan «RD Qazmunaıgaz» sııaqty, «QazTrnasOıl» da «Qazmunaıgaz» UK» AQ-nyń enshiles kompanııasy bolyp tabylady. Saraptamashynyń aıtýynsha, RD QMG aktsııalaryn satyp alǵan ınvestorlar, búgingi kúni salǵan salymdary úshin kommertsııalyq bankterdiń depozıtterindegi tabystan asyp túsetin kólemdegi tabys tapqan.
«Biz, kompanııa IPO-ny tabysty júrgizý úshin óziniń «enshilesiniń» oń tájirıbesin úırenip jáne durys paıdalanady dep oılaımyz. Sonymen qatar, «Qazmunaıgaz» tobyndaǵy korporatıvti basqarýdyń joǵary sapasy «QazTransOıldyń» qazirgi jáne keleshektegi aktsıonerleri úshin qunynyń arta túsýine yqpal etedi», - dep qorytyndylady Á.Tabyldıev.
