Sarapshylar Toqaevtyń jeńetinine kúmáni bolmaǵanyn ashyq aıtty
«Bul jolǵy saılaýda eń basty baıqaǵan ereksheligimiz - saılaý ýchaskelerinde baqylaýshylar qalyń otyrǵan jerde, tabandylyq kórsetken kezde eshqandaı shetten shyqqan zań buzý nemese protsedýralardy buzý bolǵan joq. Ony baıqap otyrdyq. Ekinshiden, shynyn aıtý kerek, bizdegi saıası mádenıet pen dástúrdiń azdyǵy, saıası naýqandardyń biraz ýaqytqa kesheýildep qalǵany - biraz saıasatqa qatysy bar azamattardyń saıası daǵdysy men praktıkalaryn tómendetkeni ańǵarylady», - dedi Aıdos Sarym elordada tilshilerge bergen suhbatynda.
Saıasattanýshy óz sózinde baıqaýshylardyń da ártúrli bolǵanyn, biri belsendilik tanytsa, ózgeleri jumysyna salǵyrt qaraǵandary da bolǵanyn aıtyp ótti.
«Basty másele - bizdegi ınternet pen Feısbýktiń yqpaly bar. Keıbir jaǵdaıda bir ǵana, bolǵan 10-20 sıýjet qaıta-qaıta qaıtalanyp, «mynaý sumdyq eken» degendeı úlken yqpal jasap otyrdy. Eń bastysy, qaı máseleni aıtsaq ta - naqty dálel men naqty ýchaskesi bolýy kerek», - dedi Aıdos Sarym.
Saıasattanýshy óz sózinde Qasym-Jomart Toqaevtyń jeńetinine kúmáni bolmaǵanyn ashyq aıtty.
«Bir jaǵynan zańdy. Biraq, ekinshi másele bar - bul saılaýdyń Qazaqstan qoǵamynyń moıyndaýy, ekinshiden - álemdik qaýymdastyqtyń moıyndaýy. Osy eki másele toǵysatyn bolsa, bolashaqta úlken saıası naýqandarǵa jol ashylady. Qoǵamnyń ózgergenin aıqyn, anyq kórdik. Qoǵam ózgerdi. Qoǵamnyń búgingi dınamıkasy bólek. Qoǵamnyń daýys berýi, keıbir ýchaskelerde Ámirjan Qosanovtyń basymdyqpen jeńiske jetkeni de kóp nárseni ańǵartady. Qoǵam bul joly tek Ámirjan Qosanovqa daýys bergen joq - ózgerister úshin daýys berdi. Qoǵamǵa jańalyq kerek. Qoǵam bılikke «estińizder, tyńdańyzdar» degen ısharat jasaǵan sekildi», - dedi ol.
Aıdos Sarym qoǵamnyń osy suraýyn qanaǵattandyrý - bıliktiń basty mindetiniń biri ekenin jetkizdi.
«Meniń oıymsha, kesheli beri aıtylyp jatqandaı, Toqaevtyń ózi de qoǵamǵa naqty sıgnal berip jatqan sııaqty. Biz oppozıtsııany, ózge ustanymda júrgen azamattardy dıalogqa shaqyramyz, bizge ózgeris pen evolıýtsııalyq damý kerek degen áńgimeni aıtyp jatyr. Menińshe, sózinde turyp, osy maqsattarǵa jetý úshin qoǵammen birigip, zańnamany ózgertý, ásirese saılaý men baspasóz, partııalar týraly zańdardy ózgertý - birinshi kezekte jasalatyn sharýalar. Budan keıin Qazaqstan uzaq merzimdi saılaý naýqandarynyń kezegine ilineıin dep otyr. Alda Májilis pen Senat saılaýy bar. Búkil Qazaqstan boıynsha jańa tártippen ótetin máslıhat saılaýlary bar. Onyń barlyǵy burynǵyǵa qaraǵanda jaqsy dárejede ótýi kerek», - dedi saıasattanýshy.
Eske sala ketsek, Exit poll nátıjesi boıynsha 9 maýsymda ótken QR Prezıdentiniń kezekten tys saılaýy barysynda saılaýshylardyń 70,13 protsenti kandıdat Qasym-Jomart Toqaevqa daýys bergen edi.
