Sarapshylar qyrǵyz týrızminiń tyǵyryqqa tirelgenine alańdaýshylyq bildiredi (FOTO)
BІShKEK. QazAqparat - Týrızm jónindegi qyrǵyz sarapshylarynyń pikirinshe, Qyrǵyzstanda týrızmdi damytý perspektıvasy kóptegen máselelerdiń sheshimin kútip tursa, al «Ystyqkól-2016» jazǵy demalys maýsymy ashylmaı jatyp keri ketetin túri bar.
Sarapshylar bul olqylyqqa qatysty basty eki sebepti alǵa tartady: birinshi - jańǵyrtý jumystarynyń kesh bastalýy. Onyń saldarynan Balyqshy qalasynan Sholpan ata qalasyna deıingi aralyqtaǵy onsyz da apatty sanalatyn ekijolaqty tar jolda qozǵalys múldem qańtarylǵan. Ekinshi sebep - pansıonattar men demalys úılerindegi baǵanyń orynsyz kóterilýi, tipti sarapshylar mundaǵy servıstiń tómendiligin aıtyp, baǵanyń oǵan saı emes ekenin alǵa tartady.
Qyrǵyzdyń týrızm jónindegi tanymal sarapshysy Davran Osmanqulovtyń aıtýynsha, Úkimet onsyz da keri kete bastaǵan jol qurylysyn toqtata turý sheshimin orynsyz qabyldap, jyǵylǵanǵa judyryq jasaǵan. «Protsessti nege toqtatty? Qazir jumys júrip jatyr, biraq tym baıaý. Jańǵyrtý jumystaryn tamyzdyń sońyna taman aıaqtaımyz deıdi, odan keler paıda ne? Bári «Kóshpendilerdiń álemdik oıyndary» úshin jasalyp jatyr. Sonda qatardaǵy týrıster ne isteıdi? Álemdik tájirıbe sporttyq jarystardyń ınvestıtsııa tartýǵa tıimdi qural ekenin, onyń eń quryǵanda kommertsııalyq turǵydan tıimdi ekenin kórsetedi. Al bizde tipti promo-rolık te daıyn emes», - deıdi Davran Osmonqýlov.
Onyń aıtýyna qaraǵanda, baǵa men sapaǵa qatysty másele de áli jaqsartýdy qajet etedi. «Bul ǵana emes, biz kólimizdi, ózenderimizdi saqtaı almaı otyrmyz, tabıǵat, qorshaǵan orta da qamqorlyq tileıdi. Qazir sheneýnikterden góri qarapaıym halyq osyǵan qatysty kóp nárseler istep jatyr. Tipti týrıster memleketke qaraǵanda kóp úles qosýda. Olardyń túsirgen rolıginiń ózi ne turady?! Al qazirshe biz týrısterden ýaqytsha qolaısyzdyqtar úshin keshirim surap, Ystyqkólden keremet kóńil kúımen qaıtýyn ǵana tileımiz», - dedi D.Osmonkýlov.
