Sarapshylar Qazaqstannyń BUU Qaýipsizdik keńesine músheligin talqylady
Belgııa astanasynda «Jahandyq Qazaqstan ózara baılanysqan álem úshin» taqyrybymen «dóńgelek ústel» otyrysy ótti. Atalǵan shara Qazaqstan Respýblıkasynyń BUU Qaýipsizdik keńesindegi músheliginiń qorytyndylaryna arnalǵan. Sharany Azııalyq zertteýlerdiń eýropalyq ınstıtýty men Qazaqstannyń Belgııadaǵy Elshiligi uıymdastyrdy.
Óz sózinde QR Syrtqy ister mınıstriniń orynbasary Erjan Ashyqbaev Qazaqstannyń BUU Qaýipsizdik keńesindegi jumysy kezinde jeti basymdyǵyn atap ótip, halyqaralyq uıymdaǵy Qazaqstannan «mura» bolyp qalǵan birneshe máseleni atady. Atap ótkende, Qazaqstannyń BUU Qaýipsizdik keńesindegi tóraǵalyǵy kezinde 2018 jyldyń qańtar aıyndaǵy basty shara - Qazaqstan Prezıdenti Nursultan Nazarbaevtyń tóraǵalyǵymen «Jappaı qyryp-joıý qarýlaryn taratpaý: senim sharalary» taqyrybymen joǵary deńgeıdegi taqyryptyq brıfıng bolyp ótti.
Taǵy bir mańyzdy shara - qańtar aıynda BUU Qaýipsizdik Keńesinde Qazaqstannyń tóraǵalyq etýimen «Aýǵanstan men Ortalyq Azııada aımaqtyq seriktestikti qaýipsizdik pen damýdyń ózara táýeldilik úlgisinde qurý» taqyrybymen mınıstrlik deńgeıinde debattar ótkizildi.
«Qazaqstannyń jetistikteri týraly aıta kele, biz «Lańkestikten azat álemge qol jetkizý tártibi» kodeksin atap ótýimiz kerek. Bul qujattyń negizgi ıdeıasy - seriktes elderdiń halyqaralyq koalıtsııasyn qurý», - dep atap ótti QR Syrtqy ister mınıstriniń orynbasary.
Ol sondaı-aq qazaqstandyq tarap daıyndaǵan bul qujatty álemniń 74 eliniń ókilderi qoldaǵanyn eske saldy.
Erjan Ashyqbaevtyń aıtýynsha, qazaqstandyq dıplomattardyń jumysynyń arqasynda qol jetkizilgen taǵy bir jetistik - 2009 jyly Erıtreıaǵa qarsy salynǵan sanktsııalardy alyp tastaý. BUU Qaýipsizdik keńesi qabyldaǵan qararǵa qarý-jaraq embargosyn alyp tastaý, jol júrýge tyıym salýdy, aktıvterdi toqtatýdy jáne maqsatty sanktsııalardy joıý kiredi.
Óz kezeginde BUU Beıbitshilik jáne qaýipsizdik máseleleri boıynsha bóliminiń basshysy Rorı Kın Qazaqstannyń tóraǵalyǵy kezinde uıymdastyrylǵan BUU QK delegatsııasynyń 2018 jyldyń qańtar aıynda Kabýlǵa saparyn mańyzdy oqıǵa dep atady.
Rorı Kın Qazaqstannyń bolashaq úshin qaýip tóndiretin, sonyń ishinde ıadrolyq qarýsyzdaný sııaqty mańyzdy máselelerdi sheshý jolyndaǵy úlesin joǵary baǵalady. Ol Qazaqstannyń bastamasymen ıAdrolyq synaqtarǵa qarsy is-qımyldyń Halyqaralyq kún tártibi bekitilgenin atap ótti.
Óz tarapynan Belgııanyń BUU QK-degi músheligi boıynsha úılestirýshisi Bert Vermesen Qazaqstannyń jahandyq ıadrolyq qarýsyzdaný, jappaı qyryp-joıý qarýlaryn taratpaý jáne bıologııalyq qaýipter salasynda qabyldap otyrǵan sharalaryna joǵary baǵasyn berdi. Ol Qazaqstan Prezıdenti Nursultan Nazarbaevtyń Semeı ıadrolyq synaq polıgonyn jabý jáne Qazaqstannyń kólemi jóninen álemde tórtinshi oryndaǵy ıadrolyq arsenaldan bas tartý týraly jigerli sheshiminiń tarıhı mańyzy men onyń álem úshin mańyzdylyǵyna nazar aýdartty.
«Biz Qazaqstannyń BUU QK-ne turaqty emes múshesi retindegi rólin qoldap, ony qańtar aıyndaǵy tóraǵalyǵyn tabysty júrgizýimen quttyqtaımyz. Eýropalyq Odaq Qazaqstannyń janjaldardy boldyrmaý jáne retteý boıynsha halyqaralyq jáne aımaqtyq deńgeıde úlesi men kúsh salýyn joǵary baǵalaıdy», - dep atap ótti Eýropalyq odaqtyń syrtqy ister qyzmetiniń Ortalyq Azııa boıynsha basqarmasynyń basshysy Borıs ıAroshevıch.
Onyń pikirinshe, Qazaqstan men Eýroodaqtyń Iranmen ıadrolyq mámilege qatysty kózqarasy ortaq.
«Men Prezıdent Nursultan Nazarbaevtyń AQSh, Reseı, Qytaı jáne EO kóshbasshylaryna jahandyq jáne aımaqtyq qaýipsizdikti turaqsyzdandyratyn janjaldardyń aldynda ulttyq, aımaqtyq jáne jahandyq damýdyń jańa joldaryn izdeýge baılanysty arnaǵan Úndeýine nazar aýdartqym kelip otyr», - dedi eýropalyq dıplomat.
Bul rette mańyzdy problemalardy talqylaý úshin Astana alańyn paıdalanýǵa bolady nemese bul máseleler BUU Bas Assambleıasynyń arnaıy sessııasynyń aıasynda qarastyryla alady, dep sanaıdy ol.
Borıs ıAroshevıch osyndaı kezdesýdi joǵary deńgeıde uıymdastyrý múmkindikterin aldaǵy ýaqytta QR jáne EO sarapshylary pysyqtaıtyny týraly aıtty.
«EO Qazaqstannyń beıbitshilik, turaqtylyq jáne qaýipsizdik máselelerin kóterýde artyp kele jatqan rólin qoldap otyr», - dep qosty ol.
Óz kezeginde Eýropalyq Parlament (EP) depýtaty, EP Shetel isteri jónindegi komıtetiniń múshesi Andreıs Mamykıns «sońǵy bes jylda Qazaqstannyń halyqaralyq arenada kóp baıqalǵanyn» atap ótti.
Andreıs Mamykıns Qazaqstannyń «mádenı dıplomatııasynyń» áleýetine de tereń senimdi.
«Qazaqstannyń mádenı murasy zor. Eki tarap - Qazaqstan men EO ekijaqty qatynasta mádenıetke úlken kóńil bóletininen úmittenemin. Sebebi mádenı qundylyqtar ózara baılanysqan álemde ortaq qorytyndy bolyp tabylady», - dedi saıasatker.
