Sarapshylar Qazaqstan oblystary ákimderiniń reıtıngisin shyǵardy
ASTANA. QazAqparat - «Saıasat-Monitoring» tobynyń zertteýshileri sáýir aıynyń qorytyndysymen ákimder jumysynyń tıimdiligin baǵalady. Jáne olardyń reıtıngisin jasady.
Zertteýshilerdiń saýaldamalaryna 30 saıasattanýshy, qoǵam qaıratkerleri, blogerler, polıttehnologtar jáne jýrnalıster qatysty. Respondentterge óńir basshylarynyń jumysyn birneshe kórsetkishter boıynsha baǵalaý usynyldy.
Onyń nátıjesinde alǵashqy úsh oryndy Astana qalasynyń ákimi Imanǵalı Tasmaǵambetov, Almaty ákimi Ahmetjan Esimov jáne Qyzylorda oblysynyń ákimi Qyrymbek Kósherbaev ıelendi. Sońǵysy qoqystarmen kúreste, sý tasqynyna qarsy sharalardy oıdaǵydaı ótkizýde jáne kóktemgi-dalalyq jumystaryna ázirlikti bastaýda erekshelendi.
Reıtıngidegi tórtinshi orynǵa Pavlodar oblysynyń ákimi Qanat Bozymbaev kóterildi. Kóshbasshylar tobyn ákimder korpýsyndaǵy eń tájirıbeli basshylardyń biri Berdibek Saparbaev tuıyqtady. Respondentterdiń baǵalaýynsha, ol basqarǵan Shyǵys Qazaqstan oblysy turaqty áleýmettik-ekonomıkalyq kórsetkishterge jetip keledi.
Ortańǵy eshelonnan birinshi orynǵa kóshbasshylar tobynan shyǵyp qalǵan Ońtústik Qazaqstan oblysynyń basshysy Asqar Myrzahmetov ıe boldy. Respondentterdiń atap ótýinshe, ákim óńirdi bes jyldan astam ýaqyt boıy basqaryp keledi. Ótken jyldyń qyrkúıeginde Memleket basshysy onyń jumysyn joǵary baǵalaǵannan keıin Myrzahmetov Astanaǵa kelip qonjııady dep kútilgen edi. Reıtınginiń jetinshi pozıtsııasyna qazirgi ákimder korpýsynyń taǵy bir «marafonshysy» - Atyraý oblysynyń basshysy Baqtyqoja Іzmuhambetov jaıǵasty.
Sáýir aıynyń qorytyndysymen Qaraǵandy oblysynyń basshysy Baýyrjan Ábdishev bir tarmaqqa joǵary jyljydy. Reıtınginiń orta sheninen Jambyl oblysynyń ákimi Kárim Kókirekbaev oryn aldy.
Batys Qazaqstan oblysynyń ákimi Nurlan Noǵaev ta ortashalar qatarynda qaldy. Qostanaı oblysy sáýirde sý tasqyny edáýir ábigerge túsirgen úsh aımaqtyń arasynda bolǵanmen, óńir bıligi jaǵdaıdy baqylaýda ustady. Bul fakti Nuraly Sádýaqasovtyń reıtıngiden 11-shi orynǵa shyǵýyna múmkindik berdi.
Mańǵystaý oblysynyń ákimi Alık Aıdarbaev negizgi toptan bir qadam keıinge toqtady.
«Tómennen birinshiler» qatarynda Aqmola oblysynyń ákimi Qosman Aıtmuhametov, Aqtóbe oblysynyń ákimi Arhımed Muhambetov jáne olardyń áriptesi Soltústik Qazaqstan oblysynyń basshysy Samat Eskendirov qaldy.
