Sarapshylar Qazaqstan men Qyrǵyzstannyń Jol kartasyna pikir bildirdi
ASTANA. QazAqparat - Qazaqstan men Qyrǵyzstannyń yntymaqtastyq týraly Jol kartasynyń basymdyqtary jaıynda qazaqstandyq sarapshylar pikir bildirdi, dep habarlaıdy QazAqparat.
«Atap aıtqanda, Jol kartasyn qabyldaýdan Qyrǵyzstan tarapynyń utar tustary kóp. Qyrǵyzstan ekonomıkasy qurylymdyq jaǵynan kóbinese Qazaqstannyń 90-shy jyldardaǵy ekonomıkasyna uqsas. ıAǵnı kóleńkeli ekonomıkanyń úlken spektri bar. Jol kartasyn qabyldaý ekonomıkanyń kóptegen kóleńkeli sektorlary «kóleńkeden» shyǵatyn bolady. Sáıkesinshe, memlekettiń salyqtyq bazasyn keńeıtedi, sondaı-aq resmı Іshki jalpy ónimniń artýyna alyp keledi. Túrli baǵalaýlarǵa súıensek, jol kartasy Qyrǵyzstan ekonomıkasynyń 10 paıyzǵa deıingi ósimin beredi», - QR Tuńǵysh Prezıdenti- Elbasy Qory janyndaǵy Álemdik ekonomıka jáne saıasat ınstıtýtynyń jetekshi sarapshysy Jaqsylyq Sábıtov Ortalyq kommýnıkatsııalar qyzmetindegi baspasóz máslıhatynda.
Onyń paıymynsha, naqty nátıjelerge qol jetkizý - atalǵan qujatty júzege asyrý sapasyna tikeleı baılanysty.
Baspasóz máslıhaty barysynda QR Prezıdenti janyndaǵy Qazaqstannyń strategııalyq zertteýler ınstıtýty dırektorynyń orynbasary, saıası ǵylymdar doktory Sanat Kóshkinbaev shekaradaǵy másele osyǵan deıin de ózekti bolǵanyn jáne ol saıasılandyrylǵan sıpatqa ıe emes ekenin atap ótti.
«Bizdińshe, bul baǵytta iske asyrylyp jatqan sharalar saýda-ekonomıkalyq kórsetkishterdi arttyrýǵa, sondaı-aq kóp jaqty formattaǵy qadamdardy jaqsartýǵa múmkindik beredi», - dedi S. Kóshkinbaev.
Óz kezeginde QR Tuńǵysh Prezıdenti- Elbasy Qory janyndaǵy Álemdik ekonomıka jáne saıasat ınstıtýtynyń jetekshi sarapshysy Jumabek Sarabekov jol kartasyn iske asyrýda resmı Bishkek tarapynan tyń kúsh-jiger paıda bolǵanyn jetkizdi.
«Jol kartasyna toqtalsaq, bul aldaǵy turǵan aýqymdy jumystan habar beredi. Qujatta kórsetilgen 50 sharanyń 29-y júıeli máselelerdi sheshýge negizdelgen. Qazaqstan tarapy Qyrǵyzstan jaǵy óz moınyna alǵan mindettemelerdi tolyqtaı oryndaıdy degen úlken senimmen qarap otyr. Jalpy, taraptar strategııalyq áriptestiktiń ustanymdaryna basa nazar aýdarý kerek. Qol jetkizilgen kelisimder ońtaıly maǵynaǵa ıe jáne bolashaqta ekonomıkalyq qatynastardy jańa deńgeıge shyǵarady degen úlken úmit bar»,- deıdi sarapshy.
Esterińizge sala keteıik , jaqynda QR Premer-Mınıstriniń birinshi orynbasary Asqar Mamın men Qyrǵyzstan Premer-Mınıstriniń orynbasary Tolkýnbek Abdygýlov ekijaqty ekonomıkalyq yntymaqtastyq týraly Jol kartasyna qol qoıdy.
Jol kartasy shekara, kólik, fıtosanıtarııalyq jáne veterınarlyq baqylaý, kedendik jáne salyqtyq ákimshilendirý salalary boıynsha ózara qarym-qatynas, sondaı-aq ekijaqty yntymaqtastyqtyń mańyzdy máselelerin sheshýge negizdelgen 50 sharany qamtıdy. Qujatta tez arada qolǵa alynýy tıis 16 shara, qysqa ýaqytta jasaýy tıis 5 jáne júıeli túrde jasalatyn 29 shara eskerilgen.
