Sarapshylar Qazaqstan ekonomıkasyna yqpal etetin aspektilerdi talqylady

NUR-SULTAN. QazAqparat - Whiteshield Partners konsaltıng kompanııasynyń menedjeri Dmıtrıı Galıtskıı Álemdik ekonomıka jáne saıasat ınstıtýtymen birlese júrgizilgen Qazaqstannyń ekonomıkasyna qatysty zertteý nátıjesi týraly aıtyp berdi, dep habarlaıdy QazAqparat tilshisi.

«Qazaqstannyń turaqtylyǵy men makroekonomıkalyq júıesine eleýli yqpal etetin birneshe aspekti bar. Birinshiden, shıkizatqa táýeldilik bıýdjet kirisin qubylmaly etip otyr. Shyn máninde, bıýdjet kirisiniń jartysy shıkizattyq emes sektormen qalyptasady. Osy arqyly shyǵystar turǵysynda teńgerimsizdik deńgeıi oryn alady», - dep toqtaldy D. Galıtskıı zertteý nátıjelerin tanystyrý barysynda.

Onyń aıtýynsha, munaıǵa degen jahandyq suranystyń joǵary deńgeıi 2030-2035 jyldarǵa tıesili bolady, odan keıin suranys birtindep tómendeı bastaıdy. Bul turǵyda Qazaqstanda ekonomıkadaǵy qaıta qurý sharalaryn iske asyrýy úshin 10-15 jyl ýaqyt bar.

«Biz osy zertteýdi koronavırýs pen munaı baǵasynyń quldyraýyna baılanysty oqıǵaǵa deıin bastaǵan edik. Sondyqtan qazirgi jaǵdaıdy nazarǵa alar bolsaq, munaıǵa suranystyń joǵary kezeńi jaqyndaı túsýi múmkin. Sáıkesinshe, qurylymdyq ózgeristerdiń qajettigi artyp keledi», - dedi sarapshy.

Osy oraıda ol eldiń jalpy bıýdjetinde shıkizattyq kiristiń kólemi joǵary bolýyna baılanysty qubylmaly kórsetkishter bolatynyn eske saldy. Bul turǵyda bıýdjettiń kiristeri men shyǵystaryn josparlaýda keıbir qıyndyqtar oryn alady.