Sarapshylar Eýropada turǵyn úı baǵasy quldyraıtynyn boljady
ASTANA. QazAqparat - Ulybrıtanııa EO quramynan resmı shyqqannan keıin iri qalalardaǵy jyljymaıtyn múlik 10-15 paıyzǵa, al ekonomıkasy barynsha álsiz eýropalyq óńirlerde - 15-25 paıyzǵa tómendeıdi. Bul boljamdy reseılik Kalinka Group rıeltorlyq kompanııasynyń sarapshylary aıtty, dep habarlady Lenta.rý.
Kompanııa jarııalaǵan baspasóz paraǵynda atap ótilgendeı, Birikken Koroldik azamattarynyń EO-dan shyǵý týraly sheshimi ekonomıkada qubylmalylyqty kúsheıtti. Referendým qorytyndysyn jarııalaǵannan keıin eýro barlyq basqa valıýtaǵa shaqqanda, quldyrap ketti. Eýroalıans modeli joǵalyp ketý qaýpine ushyrady. Eýropa megapolısinde elıtalyq turǵyn úılerge baǵa 10-15 paıyzǵa, al ekonomıkasy barynsha álsiz eýropalyq óńirlerde - 15-25 paıyzǵa tómendeıdi, dep boljaıdy sarapshylar.
Olardyń pikirinshe, valıýtanyń álsireýimen eýropalyq kapıtaldar balamaly naryqqa, onyń ishinde Reseıge baǵyttalady.
«Batys ınvestorlary reseılik syılyqaqyly jyljymaıtyn múlik naryǵyn jiti baqylaýda. Baǵa jáne suranys deńgeıi boıynsha eń turaqty bolǵany da osy segment, - degen Kalinka Group dırektorlar keńesiniń tóraǵasy E. Rýmıantsevanyń sózin keltiredi agenttik. - Sonymen, osy jylǵy bes aıda Máskeýdiń elıtalyq qurylystaryna suranys ótken jylmen salystyrǵanda, bes paıyzǵa artty, naqty daǵdarystyq deńgeıge jetti, al sharshy metriniń quny sátti jobalarda 12-17 paıyzǵa ulǵaıdy».
Kalinka Group derekterine sáıkes, sońǵy jylda reseı naryǵynan elıtalyq úılerdi Batys elderinen satyp alýshylar úlesi 30 paıyzǵa artqan.
Referendým Brıtanııada 23 maýsymda ótti. 51,9 paıyzben Brexit jaqtastary jeńiske jetti.
