Sarapshylar eń senimdi avtokólikterdi atady
ASTANA. QazAqparat - Amerıkanyń J. D. Power and Associates agenttiginiń sarapshylary AQSh-ǵy eń senimdi kólikterdiń tizimin qurastyrdy.
Tizimdi qurý kezinde sarapshylar 2012 jyly shyǵarylǵan kólik ıelerine saýalnama júrgizip, júrgizýshilerden sońǵy 12 aıda kólikterine baılanysty týyndaǵan negizgi qıyndyqtardy ataýdy suraǵan. Olardyń senimdilik deńgeıi 100 avtomobılge shaqqandaǵy aqaýlyqtar sanymen anyqtalǵan.
Senimdilik reıtınginde birinshi oryn Lexus kompanııasynyń kólikterine berildi. Sarapshylar atalmysh brendtiń 100 kóligine shaqqanda barlyǵy 89 aqaýlyqty ǵana tirkedi. Ekinshi orynda - Buick markasy (100 avtomobılge shaqqandaǵy 110 problema). Birinshi úshtikti Toyota túıindeıdi. Japonııa brendi kólikteriniń 100 kóligine shaqqanda 111 aqaýlyǵy anyqtalǵan. Kólik ıeleri eń kóp aqaýlyqtardy Jeep (100 - 197), Land Rover (100 - 258) jáne Fiat (100 - 273) kólikterinen anyqtady.
J. D. Power and Associates agenttigi sarapshylarynyń atap ótýinshe, AQSh-tyń kólik júrgizýshileri uıaly telefonda Bluetooth qosý fýnktsııasynyń jumys istemeıtinin shaǵym bildiredi. Budan basqa, birqatar júrgizýshiler óz kólikterindegi qozǵaltqysh pen berilis qorabynyń jumysyndaǵy aqaýlyqtardy atap ótken. Sondaı-aq suralǵan júrgizýshilerdiń bir bóligi aýdıojúıe, navıgatsııa, klımattyq baqylaý jáne aqparattyq oıyn-saýyq júıesiniń laıyqsyz jumysyna shaǵymdandy, dep jazady sheteldik BAQ.
