Sarapshylar «Balalar ınterneti» qyzmetin engizý máselesin taǵy kóterdi
ASTANA. QazAqparat - QR Adam quqyqtary jónindegi ýákili Asqar Shákirov jasóspirimderdi ǵalamtordaǵy zııandy aqparattan qorǵaýdyń ózekti ekendigin aıtty, dep habarlaıdy QazAqparat tilshisi.
«QR Aqparat jáne kommýnıkatsııalar mınıstrligi ınternet ónimderiniń mazmuny men kontentke baqylaýdy júrgizý turǵysynan úlken jumystardy atqaryp jatyr. Ulybrıtanııa, Reseı elderinde «Balalar ınterneti» degen túsinik bar. Atalǵan qyzmet jas urpaqty zııandy ınternet ónimderinen qorǵaıdy. Bul rette «Kók kıt», «Tıhıı dom» taǵy sol sekildi zııandy toptardy aıtyp otyrmyn. Balalardy zııandy aqparattardan qorǵaıtyn zańnama bar. Biraq bul zań sonshalyqty jumys atqaryp turǵan joq. Sýıtsıd nemese basqa da oqys oqıǵa bolsa, muǵalimder men quqyq qorǵaýshylarǵa shúıligemiz. Alaıda bul turǵydan ata-ananyń jaýapkershiligi zor ekenin de umytpaǵan abzal», - deıdi Asqar Shákirov.
Onyń aıtýynsha, balasy kámelet jasyna tolǵanǵa deıingi ata-ananyń jaýapkershiligi zańnamada taıǵa tańba basqandaı jazylǵan. Alaıda keıbireýler balalarynyń ınternette neni kórip otyrǵanyn bile bermeıtini de ras.
«Balalar ınterneti jumysynyń júıesi bar. Qolyndaǵy gadjet balalar ınternetine qosylsa, uıaly telefondaǵy bul qyzmet zııandy aqparattardan nemese toptardan balany qorǵaı alady. Meniń bilýimshe, QR Aqparat jáne kommýnıkatsııalar mınıstrldigi naqty bul iske qatysty jumysty kúsheıtip keledi. Máselen, +14, +16 nemese +18 degen kınoónimder bar. Biraq bular tek kınolar. Dál sol sekildi ınternet úshin de mundaı shekteý kerek. Meniń oıymsha, kóptegen oıyndar sheńberden asyp ketip jatady. Balalar ony oınap otyryp, boıynda qatigezdik pıǵyly qalyptasýy múmkin», - deıdi ol.
Aıta keterligi, QR Adam quqyqtary jónindegi ýákili 2017 jyldyń aqpan aıynda QR Premer-Mınıstriniń atyna balalardyń quqyǵy týrasynda hat jazyp, jetkinshekterdi zııandy aqparattardan qorǵaý týrasynda usynystaryn joldaǵan bolatyn. Asqar Shákirov ol hatynda mobıldik operatorlar arqyly elimizde «balalar ınterneti» qyzmetin iske qosýdy usynǵan.
