Sarapshylar Almaty aýasynyń lastaný sebebin aıtty
ALMATY. QazAqparat - Ulttyq saraptama ortalyǵy Almatydaǵy aýanyń lastaný deńgeıi joǵary ekenin anyqtady, dep habarlaıdy QazAqparat tilshisi.
Jyldyq josparǵa sáıkes, Ulttyq saraptama ortalyǵy qalanyń aýa basseıniniń jaı-kúıin anyqtaý úshin zerthanalyq monıtorıng júrgizdi.
2019 jyldyń birinshi jartysynda atmosferalyq aýaǵa 1576 zertteý júrgizildi, onyń ishinde 431 synamada sáıkessizdik anyqtaldy.
«Zertteý barysynda atmosferalyq aýanyń sanıtarlyq normalaryna sáıkes emestigi anyqtaldy. Azot dıoksıdi mólsheri ruqsat etilgen kontsentratsııadan 2,2 ese, kúkirt dıoksıdi 1,2 jáne kómirtek totyǵy 1,4 eseden asty. Bul lastaýshy zattar negizinen ekologııalyq qaýip týǵyzyp, adam densaýlyǵyna keri áser etedi », - dep habarlaıdy Ulttyq sarpatama ortalyǵy.
Sondaı-aq, atmosferalyq aýadaǵy kómirtek totyǵy adamǵa sezilmeıdi. Alaıda, ol dene tinderinde otteginiń jetispeýshiligin týdyrady. Bul kezde adamnyń basy aýyryp, júregi aınyp, esinen tanýy múmkin.
«Azot dıoksıdiniń aýada bolýy kómirtegi shyǵaratyn gazdarmen áreketteskende fotohımııalyq tumannyń paıda bolýyna yqpal etedi. Azot dıoksıdi - bul sarǵysh-qońyr tústi gaz, ol kórý qabiletin nasharlatady, aýaǵa qońyr reń beredi, óte ýytty, bronhıt aýrýyn týdyrady jáne aǵzanyń tynys alý organdaryndaǵy aýrýlarǵa tótep berýin tómendetedi », - dep túsindirdi mamandar.
Sarapshylar Almatydaǵy aýanyń lastanýynyń negizgi sebepterin atady. Ol - avtokólik qozǵalysy kezinde bólinetin kómirtek jáne kásiporyndardan shyǵatyn zııandy zattar. Mamandar kóptegen kásiporyndar áli kúnge deıin eskirgen tehnologııamen jumys isteıtinin atap ótti.
