Sarapshylar: Álem boıynsha ushaqta janjal shyǵarýshylar sany artyp keledi
ASTANA. QazAqparat - Halyqaralyq áýe kóligi qaýymdastyǵy (IATA) álem boıynsha ushaqtaǵy janjaldar 2015 jyly 17 paıyzǵa óskenin habarlady. Bul týraly uıymnyń baspasóz qyzmetine silteme jasap Lenta.ru habarlady.
IATA aqparatyna sáıkes, 2015 jyly álem boıynsha ushaqtardyń bortynda buzaqylardyń qatysýmen 10,8 myńnan astam janjal oryn alǵan. 2014 jyly 9,3 myńnan astam jaǵdaı tirkelgen.
Oqıǵanyń basym bóligi bir-birin balaǵattaýǵa, bort jolserikteriniń zańdy talaptaryna oryndaýdan bas tartý, basqa da jaǵdaılarmen minez kórsetýge baılanysty oryn alǵan. Onyń 11 paıyzy jolaýshyǵa nemese stıýardtarǵa kúsh qoldanýǵa nemese ushaqqa shyǵyn keltirgenderge qatysty bolyp otyr.
Bul rette tártip buzý jaǵdaılarynyń tek 23 paıyzy ǵana ishimdik nemese esirtki tutynýmen baılanysty bolyp otyr. Osylaısha, buzaqylardyń basym bóligin saý adamdar qurap otyr.
Qyrkúıektiń ortasynda reseılik «Pobeda» avıakompanııasy máskeýlik Vnýkovo áýejaıynda olardyń qyzmetkerin soqqyǵa jyqqannan keıin buzaqy jolaýshylardyń qara tizimin jasaýdy josparlap otyrǵandaryn aıtqan.
Tamyzda brıtandyq Jet2.com loýkosteri mas buzaqylarmen kúresý maqsatynda reısterinde ishimdik satýǵa shekteý engizgen. Budan basqa shildede Birikken Koroldiktiń birqatar avıokompanııalary men áýejaılary yzaqor jolaýshylarǵa jazany qatańdatatynyn habarlaǵan.
