Sarapshylar aldaǵy jyldary da Qytaı ekonomıkasynyń ósý qarqyny baıaýlaıtynyn boljaıdy
ASTANA. QazAqparat - Sarapshylar aldaǵy jyldary da Qytaı ekonomıkasynyń ósý qarqyny baıaýlaıtynyn boljaıdy. Bul týraly búgin Senatta «2016-2018 jyldarǵa arnalǵan respýblıkalyq bıýdjet týraly» Zańyna ózgerister men tolyqtyrýlar engizý týraly» zań jobasyn tanystyrylymy barysynda Ulttyq ekonomıka mınıstri Erbolat Dosaev málim etti.
Mınıstr sóz arasynda 2015 jylǵy Qazaqstan ekonomıkasynyń damý qorytyndylaryna toqtalyp ótti. Onyń aıtýynsha, elimizdiń ekonomıkasy byltyr Reseı men Qytaı sekildi saýdadaǵy negizgi áriptes elderde jaǵdaıdyń nasharlaýy, sonymen birge álemdik taýar naryǵyndaǵy baǵanyń kúrt tómendeýi sekildi keleńsiz syrtqy faktorlar áserinde boldy. «Máselen, byltyr Brent markaly munaıdyń ortasha jyldyq baǵasy 47,1 paıyzǵa tómendep, barreline 52,4 dollardy qurady. Metalǵa álemdik baǵa 21,1, astyqqa 28,7 paıyzǵa tómendedi. Búginde Qytaıda eksporttyq jáne ınvestıtsııalyq ósý kózderiniń ishki tutyný jáne qyzmetter kórsetý salasyn yntalandyrýǵa kóshý protsesi júrip jatyr. Sarapshylardyń boljamy boıynsha, aldaǵy jyldary Qytaı ekonomıkasynyń ósý qarqyny baıaýlaıtyny kútiledi. 2015 jyldyń qorytyndysy boıynsha Qytaı ekonomıkasynyń ósýi 6,9 paıyzdy quraǵan, bul sońǵy 25 jyldaǵy eń tómengi deńgeıdi kórsetti.
«Orta merzimdik perspektıvada bul úrdis saqtalyp, energetıka resýrstary men metalldar sııaqty Qazaqstannyń negizgi eksporttyq pozıtsııalaryna suranystyń tómendeýine ákep soqtyrýy yqtımal. Reseı ekonomıkasy da byltyrdan beri retsessııa jaǵdaıynda. Byltyr ol elde JІÓ tómendeýi 3,7 paıyzdy qurady. Sarapshylardyń baǵalaýynsha, 2016 jyly Batys sanktsııalary men munaı baǵasynyń tómendeýi daǵdarys protsessterin kúsheıtip, Reseıde JІÓ kórsetkishi odan ári qysqara bermek. Bul saýda jáne ınvestıtsııalyq arnalar arqyly Qazaqstan ekonomıkasyna da jaǵymsyz yqpal etedi», - dedi E. Dosaev.
