Sarapshylar AQSh-taǵy saılaýdyń Qazaqstan Respýblıkasyndaǵy dollar baǵamyna áserin baǵalady
ASTANA. QazAqparat - Qarjylyq sarapshylar Donald Tramptyń AQSh prezıdenttigine saılanýynyń Qazaqstan ekonomıkasyna áserin baǵalady, dep habarlaıdy «QazAqparat» HAA tilshisi.
«Aldymen, saılaýda Tramp jeńedi degen boljam alǵash aıtyla bastaǵanda baǵam bir dollar úshin 340 teńdegen 341 teńgege deıin ósip ketti. Bul osy sáttegi munaı baǵasynyń tómendegenimen baılanysty boldy. Biraq, sodan soń naryq bul jańalyqqa úırenip, oń ustanym negizinde qabyldady. Keshe amerıkalyq naryqtar munaı baǵasynyń 1% ósimimen jabylyp, qaıta qalpyna keldi, tústi metaldar, altyn baǵasy ósti. Nátıjesinde, biz kórip otyrǵanymyzdaı, teńge baǵamy qaıtadan nyǵaıa tústi», - dep habarlady «Asyl Invest» kompanııasynyń sarapshysy Nurlan Rahymbaev Qazaqparat tilshisine.
Onyń aıtýynsha, shıkizattyq naryqtyń reaktsııasyna qarasaq, Donald Tramptyń bılikke kelýimen qorqynyshty eshteńe bolmaǵandyǵyn ańǵarýǵa bolady. «Meniń oıymsha, munaı baǵasy qalypqa kelgennen keıin, bul shıizat naryǵy úshin oń áser ákelýi múmkin. Qandaı da bir ósimder bolýy múmkin, biraq teńge úshin eleýli saldar ákelmeıdi», - dep esepteıdi Nurlan Rahymbaev.
«Almagest» kompanııasynyń bas dırektory, ekonomıst Aıdarhan Qusaıynov nelikten Donald Tramptyń prezıdenttikke saılanýy Qazaqstan ekonomıkasyna jáne valıýtalar baǵamyna áser etýi kerek ekendigin túsine alar emes.
«Munaı baǵasy - bul jahandyq qarjylyq oıynshylardyń nátıjesi, jahandyq qarjylyq naryqtyń qozǵaýshysy. Al endi oǵan bir ǵana tulǵanyń áserin ásireleýdiń qajeti qansha. Tramp saılanǵannan keıin barlyq álemdik qarjylyq naryq basqasha ómir súrmeıdi ǵoı. (...) Birinshiden, Qazaqstanda onyń áseri onsha qatty bolmaıdy, sebebi Qazaqstannyń AQSh-pen baılanysy álsizdeý. Bizde ol elmen is júzinde saýda da damymaǵan. Bizdiń syrtqy saýda aınalymymyzdyń 95%-y - Eýropamen, Reseımen jáne Qytaımen baılanysty. Ekinshiden, bizde sheteldik ınvestorlar óz saıasatyn Qazaqstanǵa áser ete alatyndaı etip qaıta qarastyratyndaı damyǵan qor naryǵy joq. Sondyqtan da aıtarlyqtaı ózgeris bola qoımas», - dep eskertti Aıdarhan Qusaınov.
2012-2014 jyldary Reseıdiń eń yqpaldy qarjylyq sarapshylarynyń 10-dyǵyna kirgen «Alpari» sarapshysy Anna Bodrova; «bıznesmen Tramptyń amerıkalyq prezıdent taǵynda otyrýy - kapıtal naryǵy úshin jańa qubylys», - deıdi. Onyń syrtqy saıasatpen jáne ishki ekonomıkamen ne isteıtindigin eshkim de bilmeıdi. «Bir nárse anyq: ol aqshany qalaı jumys istetýdi biledi», dep esepteıdi Anna Bodrova.
Esterińizge salaıyq, AQSh-taǵy prezıdenttik saılaý dodasy sársenbi kúni mıllıarder Donald Tramptyń jeńiske jetýimen aıaqtalǵan bolatyn. Ol AQSh-tyń 45-shi prezıdenti atandy.
