Sarapshylar aqparattyq soǵysta áleýmettik jelilerdiń yqpaly artyp otyrǵandyǵyn atap ótýde
ASTANA. QazAqparat - Aqparattyq tehnologııalar zamanynda áleýmettik jeliler mıllıondardyń sanasyna yqpal etýi artyp keledi. Bul óz kezeginde aqparattyq soǵystyń buryńǵy túsinigin ózgertedi. Bul týraly búgin Astanada ótip jatqan Eýrazııalyq medıaforýmda Reseıdiń «Skolkovo» qorynyń vıtse-prezıdenti Aleksandra Barşevskaıa málim etti.
«Menińshe, aqparattyq soǵys qazirgi ýaqytta ózgeshe keıipke enýde. Men onyń qanshalyqty basqarylatynyn, qadaǵalanylatynyn bilmeımin. Biraq biz olardy basqarýdy, paıda bolǵan «tsýnamıdi» qadaǵalaýdy úırenýdemiz»,- dep atap ótti ol. - Qazir biz adam sanasyna qatty áser ete alatyn aqparattyq tehnologııalardyń qarqyndy damýy kezeńindemiz. Búginde ol psıhıkalyq aýrý sııaqty, sebebi biz áleýmettik jelilerge tereńirek dendep baramyz, olardyń yqpaly qazir BAQ-tyń yqpalynan da birneshe ese joǵary».
Onyń málimetteri boıynsha, qazirgi ýaqytta ınternette 2 mlrd. adam otyrady. Olardyń 90 paıyzy áleýmettik jelilerdiń paıdalanýshylary.
«Menińshe, qazir klassıkalyq BAQ-tyń órisi qysqaryp barady. Olardyń yqpaly da tómendeýde. Sebebi biz ózimiz qalaǵan habarlamany qazir-aq mılıondardyń sanasyna jetkize alamyz», - dep túıdi sózin A.Barşevskaıa.
