Sarapshy Joldaýda aıtylǵan 4 negizgi máseleni atap berdi
Ortalyq kommýnıkatsııalar qyzmetinde Eýrazııa ıntegratsııalyq ınstıtýtynyń sarapshylary QR Prezıdenti Qasym-Jomart Toqaevtyń Qazaqstan halqyna Joldaýyn talqylady. Máskeýlik tarıhshy Alekseı Pılko Joldaýda aıtylǵan 4 negizgi máseleni erekshe bólip taldady.
«Qoǵam men bılik dıalogy memleket turaqtylyǵy úshin óte mańyzdy shart bolyp sanalady. Kez kelgen qolaısyz másele boıynsha ashyq talqylaý bolmasa onyń sheshimi tabylmaıdy. Osy turǵydan alǵanda, Ulttyq qoǵamdyq senim keńesiniń jumysyna qajettilik bar. Kóppartııaly júıege kóshý týraly kóp aıtylyp jatyr. Bul birinshiden, básekeli ortany qalyptastyrady. Kóppartııalylyq bılik tarmaǵyn negatıvti suryptaýdan saqtaıdy. Qoǵamnyń túrli toptary memleket isine aralasa alsa, ózara túsinise alsa, odan eshbir el utylmaıdy. Eger Qazaqstan kóppartııaly teńgerimdi júıeni qalyptastyra alsa, bul memleket bolashaǵy úshin óte jaqsy irgetas bolady», - dedi Alekseı Pılko.
«Sot júıesin reformalaýdyń ar jaǵynda polıtsııa men sybaılas jemqorlyqqa qarsy is qımyldy reformalaý jatyr. Meniń oıymsha, postkeńestik keńistik úshinshi kezeńnen ótip jatyr. Birinshisi táýelsizdik alýǵa umtylys kezeńi bolsa, ekinshi kezeńde áleýmettik qamsyzdyq birinshi orynda boldy. Qoǵamnyń óz quqyǵyn talap etip, memlekettiń oǵan qulaq túrýine degen suranysy artyp otyr. Bılik osy suranystarǵa jaýap retinde aqylǵa qonymdy sot júıesin, saýatty jumys isteıtin polıtsııa men sybaılas jemqorlyqqa qarsy qatań kúres júıesin usynýy kerek. Ekonomıka týraly aıtsaq, shaǵyn bıznesti damytýǵa aktsent berildi. Zeınetaqy júıesin reformalaý múmkindigi sóz boldy. Bul óte sezimtal sala. Onyń osy Joldaýda kórinis tabýy oryndy. Eger osy máseleni sheshe alsa, memlekettik turaqtylyǵy arta túsedi. Postkeńestik keńistikte Qazaqstan saıası tranzıtti birinshi bolyp bastady. Bul jolǵa Reseı de, Belarýs eli de, basqa da elder ótýi kerek. Eger bul kezeńnen Qazaqstan sátti ótse, ózge elderge de jeńil bolady», - dedi Alekseı Pılko.
