Sarapshy: «Jol kartasyna» Qazaqstannyń sarabdal syrtqy saıasatynyń arqasynda qol qoıyldy
ASTANA. QazAqparat - Qyrǵyz tarapymen ekijaqty ekonomıkalyq yntymaqtastyq máseleleri boıynsha «Jol kartasyna» Qazaqstannyń sarabdal syrtqy saıasatynyń arqasynda qol qoıyldy. QR Tuńǵysh Prezıdenti - Elbasy qory janyndaǵy Álemdik ekonomıka jáne saıasat ınstıtýtynyń sarapshysy Jumabek Sarabekov osylaı dep esepteıdi, dep habarlaıdy «QazAqparat» HAA tilshisi.
«Qazaqstan Respýblıkasy Prezıdenti Nursultan Nazarbaev pen Qyrǵyzstan Respýblıkasynyń jańa saılanǵan Prezıdenti Sooronbaı Jeenbektiń kezdesýin kópshilik qaýym kóp kútken edi. Sózsiz, bul kezdesý senimdi aqtady. Sondaı-aq, Qazaqstan sońǵy aılardaǵy jaǵdaılarǵa qaramastan durys ustanymdy tańdady. Qazaqstan tarapy Qyrǵyzstannyń burynǵy Prezıdentiniń orynsyz aıtylǵan sózderine oraı eki el arasyndaǵy yntymaqtastyqty buzýǵa jol bermedi», - dedi agenttikke pikir bildirgen Jumabek Sarabekov.
Onyń aıtýynsha, eki el arasyndaǵy qarym-qatynastardy qalpyna keltirýde Elbasy Nursultan Nazarbaevtyń kóregendigi men syrtqy saıasattaǵy kórshilik tatýlastyq qaǵıdatty ustanýy mańyzdy ról atqarǵan. Bul joldyń durys ekendigin ýaqyt kórsetip otyr.
«Astana tarapy basymdyqty durys baǵytqa berdi. Eń joǵarǵy saıası deńgeıdegi kelisim jetistigi Astana men Bishkektiń shekarada qordalanyp qalǵan máselelerdi retteýge bet burǵandyǵyn kórsetedi», - deıdi sarapshy.
Sarapshy óz sózinde Qazaqstan men Qyrǵyzstannyń qol qoıǵan «Jol kartasyna» qoldaýmen qaraıtynyn bildirdi. Buǵan qosa úshinshi taraptyń qatysýynsyz atalǵan qujattyń bekitilýi Qazaqstan men Qyrǵyzstannyń ózara máselelerdi ózderi-aq retteı alatynyn kórsetip otyr.
Eske sala ketsek, 2017 jyldyń 2 jeltoqsanynda Qyrǵyz Respýblıkasy Úkimettik delegatsııasynyń Astanaǵa jasaǵan sapary aıasynda QR Premer-Mınıstriniń birinshi orynbasary Asqar Mamın men QR Premer-Mınıstriniń orynbasary Tolkýnbek Abdygýlov ekijaqty ekonomıkalyq yntymaqtastyq týraly Jol kartasyna qol qoıǵan bolatyn.
Mınskidegi Qyrǵyz Prezıdentimen kezdesý qorytyndysy boıynsha Elbasy Nursultan Nazarbaevtyń tapsyrmasymen Qazaqstan Úkimeti kórshi eldiń Úkimettik delegatsııasymen kelissózder júrgizdi. Sonyń nátıjesinde ekijaqty ekonomıkalyq yntymaqtastyq týraly Jol kartasyna qol qoıyldy. Onyń ishinde shekaradaǵy jaǵdaı da qamtylǵan.
Jol kartasy shekara, kólik, fıtosanıtarııalyq jáne veterınarlyq baqylaý, kedendik jáne salyqtyq ákimshilendirý salalary boıynsha ózara qarym-qatynas, sondaı-aq ekijaqty yntymaqtastyqtyń mańyzdy máselelerin sheshýge negizdelgen 50 sharany qamtıdy.
Qujatta tez arada qolǵa alynýy tıis 16 shara, qysqa ýaqytta jasalýy tıis 5 jáne júıeli túrde jasalatyn 29 shara qamtylǵan. Asqar Mamınniń aıtýynsha, bul sharalar qyrǵyz ekonomıkasynyń EAEO normalary men talaptaryna beıimdelip, bul eldiń taýarlary EAEO naryǵyna erkin shyǵa alýy úshin qolǵa alynyp otyr.
Jol kartasyna qol qoıǵan soń Qazaqstan men Qyrǵyzstan EAEO syrtqy shekarasynda kedendik, salyqtyq, veterınarlyq, fıtosanıtarııalyq jáne sanıtarlyq-epıdemıologııalyq baqylaý júrgizýdi qamtamasyz etýdiń jańa tásilderine, sondaı-aq Qazaqstan-Qyrǵyz shekarasy arqyly eksporttyq-ımporttyq jáne tranzıttik taýarlardy Eýrazııalyq ekonomıkalyq komıssııa ókilderiniń qatysýymen ótkizýge qol jetkizedi.
Óz kezeginde qyrǵyz tarapy joǵaryda kórsetilgen salalar boıynsha EAEO talaptaryna tolyqtaı saı keletin dárejede baqylaý jasaýdy moınyna aldy. Asqar Mamınniń paıymdaýynsha, «Jol kartasynda» kórsetilgen sharalardy tolyqqandy ári ýaqtyly oryndaý ashyqtyq qaǵıdattary boıynsha ortaq naryq qalyptastyrýǵa, legıtımdi ári ózara tıimdi paıdaǵa jetýge, sonymen qatar tatý kórshilik jáne dostyq baǵytta saýda-ekonomıkalyq ózara tıimdi qarym-qatynasty kúsheıtýge múmkindik beredi.
QR Premer-mınıstriniń birinshi orynbasary EAEO aıasynda tehnıkalyq reglament talaptaryn saqtaý jumysy boıynsha birlesken jumys, sonda-aq qazaqstandyq organdarda zańdy ekeni bekitiletin qyrǵyz taýarlaryna sertıfıkatsııa júrgiziletinin habarlady.
«Jol kartasyna» qol qoıý nátıjesi boıynsha taratpar 2017 jyldyń 3 jeltoqsany kúngi 00:00 ýaqytynda Qazaqstan Respýblıkasynyń Shekara qyzmeti qazaqstandyq-qyrǵyzstandyq shekaranyń barlyq baqylaý pýnktinde kúndelikti kúsheıtilgen shekaralyq baqylaýǵa kóshetini týraly kelisimge keldi.
