Sarapshy: Jańa óńirler - jańa múmkindikterge jol ashady

ALMATY. QazAqparat - Prezıdenttiń ákimshilik-aýmaqtyq qaıta qurý týraly bastamasy - Qazaqstannyń áleýmettik ómiriniń barlyq nysandarynyń negizderin nyǵaıtady. Aýmaqtyq uıymdastyrýdy jetildirý ekonomıkaǵa oń áser etip, jańa múmkindikter týǵyzady. Mundaı pikirdi QR Prezıdenti janyndaǵy Qazaqstan strategııalyq zertteýler ınstıtýtynyń aǵa ǵylymı qyzmetkeri Bekjan Sadyqov bildirdi, dep habarlaıdy QazAqparat tilshisi.

«Birinshiden, ákimshilik-aýmaqtyq reforma - bul óńirler arasyndaǵy áleýmettik-ekonomıkalyq damýdy teńestirý faktory. Jańa óńirler ákimshiliginiń aldynda ómir súrý deńgeıi men sapasyn arttyrý úshin qarjy resýrstaryn tıimdi paıdalaný mindeti tur. Qoǵamnyń qazirgi suranystaryna jaýap berip qana qoımaı, aǵymdaǵy óndiristik qýattardyń júktelýin qamtamasyz etý, taýarlar men qyzmetterdiń bólinýin uıymdastyrý jáne eńbek áleýetin barynsha paıdalaný qajet. Áleýmettik-ekonomıkalyq kórsetkishterdi arttyrý mańyzdy»,- deıdi sarapshy.

Onyń aıtýynsha, jańa óńirler taýarlar men qyzmetterdiń mamandandyrylǵan jetkizýshisi retinde bekitilýi múmkin.

«Ekinshi múmkindik – óńirler úshin. Jańa óńirler taýarlar men qyzmetterdiń mamandandyrylǵan jetkizýshisi retinde bekitilýi múmkin. Básekege qabiletti jáne salystyrmaly artyqshylyqtarǵa nazar aýdarý, jańa qýattylyqty salý nemese eski qýattylyqty keńeıtý jáne aımaqtyq bıznestiń tıimdiligin arttyrý arqyly salany «qaıta iske qosý» mańyzdy. Tutastaı alǵanda, óńirlerdi keshendi damytý jónindegi maqsatqa qol jetkizý jáne óńirlerdiń aǵymdaǵy problemalarymen jumys isteý ǵana emes, sondaı-aq uzaq merzimdi perspektıvada qosylǵan qundy qurýǵa úles qosý mańyzdy»,- deıdi ol.

Sonymen qatar, ol is júzinde jańa óńirlerge óńirlik ekonomıkalardyń damýynyń barlyq ólshemderin eskeretin jáne jergilikti halyqtyń suranystaryna saı keletin ózindik damý strategııasy qajet ekenin basa aıtty.

«Bul turǵyda jergilikti ózin-ózi basqarýdy damytý jáne ortalyqsyzdandyrý mindetterge qol jetkizýdiń mańyzdy quraly. Qoǵam qaıratkerleri men belsendi azamattar óńirlik sheshimder qabyldaýdyń sapasy men ashyqtyǵyn kúsheıte alady, al bul – jańa óńirlerdiń ózin-ózi qamtamasyz etýiniń jáne búkil ulttyq ekonomıka serpininiń basty sharty»,-dep qortyndylady sózin Bekjan Sadyqov.