Sarapshy: Jańa Májilistiń mindetteriniń biri – áleýmettik tolqýlardyń aldyn alý

ASTANA. QazAqparat – QR Prezıdenti janyndaǵy Qazaqstan strategııalyq zertteýler ınstıtýty strategııalyq taldaý bóliminiń basshysy Ermek Toqtarov Májilistiń jańa quramy men onyń aldaǵy qyzmetine qatysty pikir bildirdi, dep habarlaıdy QazAqparat tilshisi.

«Jalpy Parlamenttiń jańa quramynan, onyń ishinde Májilisten úlken úmit kútemiz. Qoǵam múddesiniń aldyńǵy orynda turýy mańyzdy. Májilis depýtattarynyń ókildigi qoǵam problemalary men olardy sheshý fýnktsııasyn atqarýymen erekshelenedi. Sonymen qatar saılaýshylarmen, áleýmettik top, ózi saılanǵan okrýgpen únemi baılanysta bolýy tıis. Azamattardyń máseleleri men suraýlaryn tyńdap qana qoımaı, ony saıası tilge aýdaryp, Parlamentte usyna bilý óte mańyzdy», – deıdi Ermek Toqtarov.

Sarapshynyń pikirinshe, zań shyǵarý jumysy joǵary deńgeıde bolýy tıis.

«Ideıany usyný - bir sharýa, al ony dáleldep, qorǵap jáne túpkilikti sheshim qabyldaý kezinde barlyq máseleni eskerip, sendirý - bólek dúnıe. Rasy kerek, mundaı jumys tájirıbesi joq adamdarǵa qıynǵa soǵady. Baıqaǵanymyzdaı, jańa shaqyrylym depýtattarynyń úshten biri ǵana buryn máslıhat nemese Májilistiń depýtaty bolǵan. Alaıda, depýtattyń zań shyǵarýǵa qatysty tájirıbesi bolmaýy múmkin, ony zań da talap etpeıdi. Osy oraıda bekitilgen protsedýralar men erejeler bar degen úmittemiz. Parlamenttiń zań shyǵarý jumysy joǵary deńgeıde bolýy tıis», - dep tolyqtyrdy QR Prezıdenti janyndaǵy QSZI sarapshysy.

Sondaı-aq, spıker Májilis depýtattary ókilettigin atqarýda qanshalyqty belsendi bolady degen saýalǵa jaýap berdi.

«Biz kóbine belgili bir qabyldanǵan sheshimderge nemese qandaı da bir zańǵa qatysty synı kózqaras, baǵalaýdyń bolmaýy áleýmettik narazylyqqa ákeletinin baıqadyq. Parlamenttiń jańa shaqyrylymynyń mindetteriniń biri - barlyq taraptardyń múddesin eskere otyryp, áleýmettik tolqýlardyń aldyn alý. Árıne, ázirge baǵa berýge erte. Aldaǵy jyly biz olardyń qanshalyqty tıimdi bolǵanyn, mandattardy saqtaý nemese tańdaý qajettiligi bar-joǵyn kóremiz. Ázirge qorytyndy jasaýǵa áli erte», - deıdi Ermek Toqtarov.

Májilis depýtattarynyń tolyq tizimimen osy siltemede tanysýǵa bolady.

Sonymen qatar búgin Ortalyq saılaý komıssııasy Májilistiń 8-saılanym depýtattaryn resmı túrde tirkedi.

Aıta ketsek, erteń Memleket basshysy Qasym-Jomart Toqaev VIII saılanǵan QR Parlamentiniń birinshi sessııasynyń ashylýynda sóz sóıleıdi.