Sarapshy: Vaktsınadan keıingi aýyrsyný - qalypty reaktsııa
QYZYLORDA. QazAqparat - Adamdardyń kópshiligi vaktsınany eshqandaı erekshe belgisiz ótkizedi. Keıbir jaǵdaıda ekpeden keıingi aýyrsyný - qalypty reaktsııa. Qyzylorda qalasyndaǵy №3 emhananyń epıdemıolog-dárigeri Gúlnur Іlııasova QazAqparat tilshisine vaktsına qabyldaý barysyndaǵy densaýlyqtaǵy ózgeris jaıynda osylaı dedi.
Keı adamdarda ınektsııa ornynda azdap aýyrsyný, qyzarý nemese isiný, álsizdik bolýy múmkin. Bulshyq etterde azdap yńǵaısyzdyq bolýy yqtımal. Deneniń qyzýy kóterilýi, azdap qaltyraý, júrek aıný jáne lımfa túıinderiniń shamaly ulǵaıýy da múmkin. Munyń bári - ımmýnıtetti qalyptastyrýdaǵy qalypty reaktsııalar.
«Degenmen, dene qyzýy 38 gradýstan asqan jaǵdaıda sýyq tıgende qoldanatyn ystyq túsiretin dárini qabyldaýǵa bolady. Ásirese, paratsetamoldy qoldanýdyń paıdasy zor. Keıde dene qyzýynyń kóterilýi eki-úsh kúnge sozylýy kórinis berip jatady. Vaktsınanyń ekinshi komponentin saldyrmasa, adamda ımmýnıtet qalyptaspaıdy. Óıtkeni, ekeýiniń quramy eki túrli. Sondyqtan bir-birinsiz adamnyń boıynda ımmýnıtet bolmaıdy. Ekinshi komponentin mindetti túrde saldyrý kerek», - dedi epıdemıolog-dáriger.
Sondaı-aq, ekpeni aǵzaǵa engizgennen keıin, qaýipti allergııalyq reaktsııa múmkindigin boldyrmaý úshin dárigerlerdiń baqylaýynda biraz ýaqyt ótkizý kerek. Alaıda osydan keıin de kún sońyna deıin kólik júrgizbegen abzal. Dárigerler múmkindiginshe ınektsııadan keıin birneshe kún ishimdik ishýden bas tartýǵa keńes beredi. Óıtkeni qandaǵy alkogol kez-kelgen aýrýdan ımmýnıtettiń qalyptasýyna jol bermeıdi.
Sońǵy ýaqytta óńirdegi vırýs deńgeıiniń kúrdelenip, úndilik Delta shtamm belgileriniń taralýy saqtyq sharalaryn qatań saqtaýdy talap etedi.
Eske salsaq, Qyzylordada 195 myńnan astamadam koronavırýsqa qarsy vaktsına saldyrdy.
