Sarapshy: Turǵyndar arasynda dúrbeleń týdyratyn áreketterge jol berilmeýi kerek

NUR-SULTAN. QazAqparat - QR Prezıdenti janyndaǵy Qazaqstan strategııalyq zertteýler ınstıtýtynyń bas ǵylymı qyzmetkeri Bolat Áýelbaev Qaýipsizdik Keńesiniń otyrysy týraly pikir bildirdi, dep habarlaıdy QazAqparat tilshisi.

«Halyq arasynda kibise jyldy qıyn jyl dep aıtady. Nanym-senim bolsa da, jyl basynda úreıli oqıǵalar oryn aldy. Jańa jyldan keıin Irannyń áskerı- saıası elıtasy Kasem Sýleımanıge jasalǵan amerıkalyq áýe soqqysy álemdi dúr silkindirdi», - deıdi sarapshy.

Sonymen birge, bul máselege shyǵystaǵy vırýs máselesi qosyldy. Qytaıdyń Ýhan qalasynda 2019-nCoV koronavırýsynan jańa indet órshidi.

«Qytaıdyń iri ortalyqtary karantınge jabyldy. Kórshi eldegi epıdemıologııalyq jaǵdaı áli de aýyr, aýrýdyń taralý qaýpi de óte joǵary bolyp otyr», - dep atap ótti sarapshy.

Al Qazaqstanda Qordaı aýdanynyń Masanchı aýylynda bolǵan jappaı tártipsizdik kútpegen oqıǵa boldy. Onyń saldarynan adamdar qaza taýyp, turǵyndar materıaldyq zardap shekti.

«Biraq elimizde jáne odan tys aýmaqtarda túrli pikirler men qaýesetter tarady. Osyǵan baılanysty memlekettik bılik deńgeıinde de, halyq arasynda da bolǵan oqıǵalardy egjeı-tegjeıli túsindirý mańyzdy. Qazirgi ýaqytta QR Prezıdenti Qasym-Jomart Toqaevtyń tapsyrmasymen zardap shekken eldi mekenderde qalpyna keltirý jumystary júrýde. Óz kezeginde QR Tuńǵysh Prezıdenti Nursultan Nazarbaev ta jaǵdaıǵa alańdaýshylyq bildirdi, onyń tóraǵalyǵymen Qaýipsizdik Keńesiniń otyrysy ótti», - dedi ol.

Jıyn barysynda ishki saıasat pen qaýipsizdik máseleleri qaraldy. Ásirese, jergilikti atqarýshy jáne quqyq qorǵaý organdarynyń, Qazaqstan halqy Assambleıasy men onyń aımaqtyq fılıaldarynyń jumys sapasyna erekshe nazar aýdaryldy.

Sonymen birge, Qaýipsizdik Keńesiniń Tóraǵasy respýblıkada koronavırýstyń taralýy, onyń ekonomıkalyq saldary tóńiregindegi jaǵdaıdy baqylaýdyń jáne ýaqytyly shara qabyldaýdyń mańyzdylyǵyn atap ótti.

«Mundaı sıpattaǵy protsesterdi aldyn-ala ázirleý kerek. Sharalar tolyqqandy bolýy tıis, al turǵyndar arasynda dúrbeleń týdyratyn shamadan tys áreketterge jol berilmeýi kerek», - dedi Bolat Áýelbaev.

Aıta keteıik, elordada QR Tuńǵysh Prezıdentiniń tóraǵalyǵymen Qaýipsizdik Keńesiniń otyrysy ótti. Jıyn barysynda Jambyl oblysy Qordaı aýdanyndaǵy jaǵdaı, bıologııalyq qaýipsizdikti qamtamasyz etý jáne koronavırýstyq ınfektsııanyń taralýyna qarsy turý máseleleri qaraldy.