Sarapshy: Tegin kásibı-tehnıkalyq bilim berýdi engizý strategııalyq sheshim boldy

ASTANA. QazAqparat - QR Prezıdentiniń 30 qarashada jarııalaǵan Joldaýynda tegin kásibı-tehnıkalyq bilim berýdi engizý jónindegi tapsyrmasy strategııalyq sheshim boldy. Búgin QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda Qoǵamdyq-saıası úrdister saraptamalyq-jobalaý bıýrosynyń dırektory Orazǵalı Selteev osyndaı pikir bildirdi.

Onyń sózi boıynsha, QR Prezıdenti óz Joldaýynda Qazaqstanda sapaly mamandardy daıarlaý isine úlken mán berilgen.

«Damýdyń, ındýstrııalandyrýdyń negizi - mamandar. Osy maqsatta bizdiń elde Avstralııa, Germanııa, Sıngapýr elderimen birlese otyryp, mamandardy daıarlaý ortalyqtaryn ashý kózdelip otyr. Maǵan unaǵany, biz naqty eki platformada maman daıarlaýdy naqtylap aldyq. Ol - Nazarbaev Ýnıversıteti men Alataý tehnıkalyq parki. Munda ǵylym men bıznestiń tájirıbede qalaı yqpaldasatyndyǵyna da kóp másele baılanysty», - dep atap ótti O. Selteev.

«Prezıdent tegin kásibı-tehnıkalyq bilim berýdi engizýdi tapsyrdy. Bul usynystan men Elbasynyń eki maqsatty ustanǵanyn kórip otyrmyn. Birinshiden, bul «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı 20 qadam» tujyrymdamasynyń damýyna jańasha serpin berý. Onyń basty quraly «Jumyspen qamtýdyń jol kartasy-2020» baǵdarlamasy bolyp tabylady. Endi Joldaýda aıtylǵan bastama kelesi kezeńniń bastalýyn bildiredi. Keleside árbir qazaqstandyq kásibı-tehnıkalyq bilimdi memleket esebinen tegin ala alady. Ekinshiden, osy sheshimi arqyly Elbasy strategııalyq maqsattardy kózdedi dep sanaımyn. Biz árdaıym ındýstrııalandyrý týraly aıtyp kelemiz, ol júzege asyp ta jatyr. Biraq joǵaryda aıtqanymdaı, ındýstrııalandyrý - ol aldymen kadrlar. Memleket basshysy osy qadamy arqyly bolashaqqa kóz tastap otyr, demek ol qazirden bastap, ındýstrııalandyrý jobalaryna qajet bolatyn mamandardy daıarlaýǵa negiz qalap berdi», - dedi ol.

Aıta keteıik, 2017 jyldan bastap qazaqstandyqtarǵa tegin kásibı-tehnıkalyq bilim beriledi. Bul jóninde Qazaqstan Respýblıkasynyń Prezıdenti Nursultan Nazarbaev «Qazaqstan jańa jahandyq naqty ahýalda: ósim, reformalar, damý» taqyrybynda jasaǵan kezekti Joldaýynda atap ótken bolatyn.

«Men búgin qazaqstandyqtarǵa 2017 jyldan bastap «Barlyǵyna arnalǵan tegin kásibı-tehnıkalyq bilim» atty jańa baǵdarlama iske qosylatynyn jarııalaǵym keledi. ıAǵnı, memleket árbir azamatqa bastapqy mamandyqty berýge mindetteledi. Mektepti támamdap, qol qýsyryp qalǵan jas azamat kelip, alǵashqy mamandyqty, jumys isteıtin mamandyqty alýyna bolady, osydan bastaý kerek. Úkimetke osyny júzege asyrýǵa kirisýdi tapsyramyn», - dedi N.Nazarbaev.