Sarapshy Senattyń jańarǵan quramyna qatysty pikir bildirdi

ASTANA. QazAqparat — Senattyń jańarǵan quramyn sátti jasaqtaý saıası ınstıtýttar turaqtylyǵyn bildiredi. Mundaı pikirdi QR Prezıdenti janyndaǵy Qazaqstan strategııalyq zertteýler ınstıtýty saıası zertteýler bóliminiń jetekshisi Ermek Toqtarov aıtty, dep habarlaıdy QazAqparat tilshisi.

Onyń atap ótýinshe, Senat depýtattyq korpýsynyń bir bóligin saılaý konstıtýtsııalyq merzimde ótti.

«Osy turǵydan alǵanda Parlamenttiń joǵary palatasy Májilistiń jańa shaqyrylymy jasaqtalatyn kezeńdegi zańnamalyq dástúrdiń sabaqtastyǵyn qamtamasyz etetin turaqty saıası ınstıtýt retinde bolady. Referendým qorytyndysynda Senattyń ókilettik qyzmeti kúsheıtildi. Senatorlardyń sany artyp, jańa óńirlerdiń, Abaı, Ulytaý jáne Jetisý oblystarynyń ókilderi kirdi. Sonymen qatar Qazaqstan halqy Assambleıasynyń depýtattyq kvotasy Májilisten Senatqa berildi», - dedi sarapshy.

Ermek Toqtarov Senat adam quqyqtary jónindegi ýákildi saılaý, Prezıdenttiń Konstıtýtsııalyq sot, Ulttyq bank, Joǵarǵy sot keńesi tóraǵalaryn, Bas prokýrordy jáne Ulttyq qaýipsizdik komıtetiniń tóraǵasyn taǵaıyndaýyna kelisimin berý arqyly memlekettik basqarý júıesin qalyptastyrýdaǵy óz yqpalyn saqtap qalǵanyn aıtady.

«Senat Qazaqstannyń saıası júıesiniń mańyzdy elementi sanalady. Joǵary palatanyń jańarǵan quramyn sátti qalypastyrý saıası ınstıtýttar turaqtylyǵyn, olardy qalyptastyrý protsedýralarynyń tyńǵylyqtylyǵyn kórsetedi. Májilis bolmaıtyn kezeńde Senat Parlamenttiń búkil zańnamalyq qyzmetin oryndaıdy. Bul aldaǵy saılaýdy eldegi ortalyq bılik ókildigin saqtaı otyryp ótkizýge múmkindik beredi», - dedi ol.

Foto: kisi.kz