Sarapshy: Saıası partııalardyń Parlamentke enýine jaǵdaı jasalyp keledi

NUR-SULTAN. QazAqparat – Qazaqstan strategııalyq zertteýler ınstıtýtynyń aǵa ǵylymı qyzmetkeri Silámjar Ahmetjarov Ulttyq qoǵamdyq senim keńesiniń ekinshi otyrysynda kóterilgen máseleler men usynystarǵa qatysty pikir bildirdi, dep habarlaıdy QazAqparat tilshisi.

«Ulttyq qoǵamdyq senim keńesi osy ýaqytqa deıin sarapshylar aıtyp ótkendeı, qoǵam men bılik arasyndaǵy kópir ispettes. Keıingi aılarda ózińiz kórgendeı, Memleket basshysy Ulttyq keńestiń árbir múshesimen jeke-jeke kezdesip, ekonomıkalyq, áleýmettik, saıası aspektterdi túrlendirý joldaryn keńinen talqylaǵan bolatyn. Sarapshylardyń, Ulttyq keńes músheleriniń usynystary Memleket basshysynyń dál búgin kótergen bastamalarynyń negizi bolyp otyr», - dedi sarapshy QazAqparat tilshisine.

Silámjar Ahmetjarov búgingi usynystardyń ishinde saıası turǵydaǵy usynystardy erekshe nazar aýdarǵanyn aıtady.

«Prezıdent kótergen bastamalardyń qaı-qaısysynyń da mańyzy zor. Saıası partııalardyń múshelerin tirkeýdi 40 myńnan 20 myńǵa azaıtý, jala japqany úshin qarastyrylǵan baptyń dekrımınalızatsııasyn, mıtıngterdiń eskertýshi sıpattaryn kórip otyrmyz. Osynaý ózgeristerdiń bári – bizdiń eldiń saıası alańnyń lıberalızatsııasyn kórsetedi. ıAǵnı, saıası alańnyń básekesi arta tústi. Bul degenińiz basqa da saıası partııalardyń Parlamentke enýine jaǵdaı jasalyp, olardyń osy joldaǵy kedergileri joıylyp jatqanyn kórsetedi», - dedi ol.