Sarapshy: Sanaqqa durys jaýap berý arqyly bolashaq sheshimderdiń sapaly qabyldanýyna yqpal etemiz

NUR-SULTAN. QazAqparat – Ulttyq statıstıka bıýrosynyń sońǵy málimetteri boıynsha 302 myńnan astam respondent onlaın sanaqtan ótken. «Eýrazııalyq monıtorıng» saraptamalyq zertteýler ortalyǵynyń dırektory Álibek Tájibaevtyń aıtýynsha, kez kelgen sanaqtyń eń mańyzdy mindeti – qoldanystaǵy derekterdiń shynaıylyǵyna kóz jetkizip, málemetterdi ózektilendirý. QazAqparat tilshisine telefon arqyly bergen suhbatynda sarapshy osylaı dedi.

«Buǵan deıin halyq sanaǵy 2009 jyly ótkizildi. Odan beri 10 jyldan astam ýaqyt ótti. Sondyqtan memleketti tıimdi basqaryp, tıimdi josparlaý úshin, basshylyq jáne júıelik sheshimderdi durys qabyldaý úshin derekterdiń ózekti bolǵany, únemi jańartylyp otyrǵany mańyzdy. Halyq sanaǵy byltyr ótýi kerek edi. Biraq, ókinishke qaraı, pandemııaǵa baılanysty merzimi ózgerildi», - deıdi maman,

Onyń paıymynsha, sońǵy 10 jylda Qazaqstan ǵana emes, búkil adamzat túbegeıli ózgeristerdi bastan ótkergen. Sondyqtan árbir qazaqstandyq sanaq máselelerine barynsha jaýapkershilikpen qaraýy kerek.

«Sanaqty eki kezeńde ótkizý durys. Jeke ózim, sarapshy retinde, bul máselege kúmándanbaımyn. Óıtkeni mundaı tásil neǵurlym kóbirek ózekti aqparat alýǵa baǵyttalǵan», - dedi «Eýrazııalyq monıtorıng» saraptamalyq zertteýler ortalyǵynyń dırektory.

Sarapshy sanaqqa jaýapkershilikpen qaraý arqyly turǵyndar óz taǵdyryna qatysty sheshimderdiń sapaly qabyldanýyna yqpal etetinin eske saldy.

«Jergilikti ózin-ózi basqarý organdary naqty óńirde qansha adam turatynyn bilse, olardyń sanatyn durys saralaı alsa, áleýmettik qoldaýǵa qatysty durys sheshim qabyldaı alady. Belgili bir óńirde qalyptasqan áleýmettik máseleni sheshýge qajet qarajattyń jetkilikti mólsherde bólinýi úshin de statıstıkalyq derekterdiń durys bolý kerek. Sondyqtan suraqtarǵa durys jáne dál jaýap bergen abzal», - dedi Álibek Tájibaev.