Sarapshy: Referendým - Túrkııadaǵy ishki saıası protsesterdiń qorytyndysy
Qazaqstan Respýblıkasy Tuńǵysh Prezıdentiniń Qory janyndaǵy Álemdik saıasat jáne ekonomıka ınstıtýtynyń syrtqy saıasat boıynsha sarapshysy Jumabek Sarabekov osyndaı pikir bildiredi.
«Eń aldymen, referendýmnan keıin Túrkııa parlamenttik basqarý úlgisinen prezıdenttik úlgige kóshedi. Nátıjesinde, memlekettik basqarý júıesi tolyǵymen ózgertilmek: prezıdent ókilettikteriniń aýqymy keńeıtiledi. Budan bylaı, memleket basshysy parlamentti taratýǵa jáne zań kúshi bar jarlyqtar shyǵarý quqyǵyna ıe bolady. Bul rette referendým nátıjeleri túrik qoǵamyndaǵy mańyzdy ıdeologııalyq ózgeristerden habar berýi múmkin»,- deıdi sarapshy.
Jumabek Sarabekovtyń paıymdaýynsha, referendým nátıjeleri qazirgi prezıdent Erdoǵan men onyń Ádilettik jáne damý partııasynyń saıası pozıtsııalarynyń edáýir kúsheıgenin bildiredi. Konstıtýtsııa ózgergennen soń, Túrkııa saıası ómirindegi áskerılerdiń yqpaly ary qaraı tómendeı beredi. Oppozıtsııa úshin de saıası báselestik artyp otyr.
«Sonymen birge, referendým túrik qoǵamyndaǵy jiktelý protsesterin kúsheıtýi de yqtımal. Konstıtýtsııaǵa ózgeris engizý týraly usynysty qoldaǵandar sany az ǵana basymdyq kórsetti. Al Ankara, Ystanbul jáne Izmır sııaqty iri qalalar turǵyndarynyń kópshiligi túzetýdi qoldamaıdy. Sondyqtan Túrkııanyń saıası bıligi úshin qoǵamdaǵy ıdeıalyq birigý máselesiniń sheshimin tabý qajettigi artyp otyr.
Al syrtqy saıasatta referendým Ankara men Eýropalyq odaq arasyndaǵy qaıshylyqtardyń kúsheıýine ákep soqtyrýy múmkin. Sebebi refendýmnan soń Túrkııa Eýroodaqqa múshelik etý týraly kelissózderdi toqtatýǵa alyp keletin qadamdarǵa barýy múmkin».