Sarapshy pikiri: Aldaǵy saılaý – azamattyq belsendilik múmkindikterin keńeıtý baǵytyndaǵy mańyzdy qadam
«Memleket basshysy Májilisti taratyp, máslıhattardyń ókilettigin toqtatý týraly sheshim qabyldady. Depýtattyq korpýstyń jańa shaqyrylymyn saılaý 19 naýryzǵa belgilendi. Saılaýdyń taǵaıyndalýy – birazdan beri kútip otyrǵan jańalyǵymyz. Prezıdent byltyr kúzdegi Joldaýynda Májilis pen máslıhattar saılaýy osy jyldyń birinshi jartysynda ótetinin málim etken edi. Májilis depýtattaryn kezekten tys saılaý – Konstıtýtsııalyq reformaǵa sáıkes saıası júıeni jańǵyrtýdyń bir kezeńi», - dedi Ermek Toqtarov.
Sarapshynyń aıtýynsha, bul saılaýdyń burynǵy saılaýdan aıyrmashylyǵy aralas saılaý júıesinde.
«Endi saılaýshylardyń daýsyn jınaýǵa tek saıası partııalar ǵana emes, partııada joq azamattar da talasa alady. Bul bir mandatty saılaý okrýgteri boıynsha saılaý ótkizý arqyly múmkin bolady. Majorıtarlyq jolmen saılanǵan depýtattar Májiliste 30%, oblystardyń, Astana, Almaty jáne Shymkent qalalarynyń máslıhattarynda 50%, aýdandyq jáne oblystyq mańyzy bar qalalardaǵy máslıhattarda 100% bolady. Barlyq tirkelgen partııalardyń, onyń ishinde jańadan qosylǵan «Baıtaq» jáne «Respublica» kandıdattary Májilistegi 69 depýtattyq mandatqa úmitker bola alady. Qalǵan 29 mandat majorıtarlyq jolmen bólinedi», - deıdi ol.
Sondaı-aq, sarapshy partııa kandıdattary oblystyq máslıhattardaǵy 334 depýtattyq orynǵa úmitker bola alatyndyǵyn jetkizdi. Barlyǵy 3 749 máslıhat depýtaty saılanbaq.
«Oblystarda, Astana, Almaty jáne Shymkent qalalarynda 668 depýtattyń 334-i bir mandatty okrýgter boıynsha saılanady. Qalalyq máslıhattarda olardyń sany – 617, al aýdandyq máslıhattarda – 2 130. Osylaısha, máslıhattardyń depýtattyq korpýsynyń 82%-y jańartylǵan júıe boıynsha saılanady. Bul – azamattyq belsendilik múmkindikterin keńeıtýge baǵyttalǵan mańyzdy qadam. Memleket basshysy azamattyq jaýapkershilik tanytýǵa jáne Májilis pen máslıhattar saılaýyna belsendi qatysýǵa shaqyrdy. Saıası jańǵyrý kýrsy senimdi jáne dáıekti túrde júzege asyrylyp keledi», - deıdi E. Toqtarov.
Eske salsaq, búgin Memleket basshysy jetinshi saılanǵan QR Parlamentiniń Májilisin taratý jáne QR Parlamenti Májilisi depýtattarynyń kezekten tys saılaýyn taǵaıyndaý týraly Jarlyqqa qol qoıdy.
Májilis depýtattaryn kezekten tys saılaý 19 naýryzǵa belgilendi.
Sondaı-aq, Memleket basshysy barlyq deńgeıdegi máslıhattardyń ókilettigin toqtatý týraly Jarlyqqa qol qoıdy.
Memleket basshysy Qasym-Jomart Toqaev Parlament Májilisi jáne máslıhat depýtattarynyń kezekten tys saılaýyn taǵaıyndaý týraly málimdeme jasady.
