Sarapshy Májilis saılaýy týraly: proportsıonaldy-majorıtarlyq júıe qaıta ózektendiriledi

ASTANA. QazAqparat – 19 naýryzda Májilis jáne máslıhat depýtattarynyń kezekten tys saılaýy ótedi. Osy oraıda QazAqparat tilshisi aldaǵy saılaý naýqanynyń ereksheligin naqtylaý maqsatynda QR Prezıdenti janyndaǵy Qazaqstannyń strategııalyq zertteýler ınstıtýtynyń jetekshi ǵylymı qyzmetkeri Janar Sanhaevamen pikir alysqan edi.

«Bıyl 19 naýryzda Parlament Májilisi men máslıhat depýtattary saılaýy ótedi. Bul jolǵy saılaýdyń ereksheligi - aralas júıe boıynsha uıymdastyrylady. Elimizde bir mandatty okrýgter boıynsha sońǵy ret saılaý 2004 jyly ótti. Osy turǵyda saılaýdy aqparattyq qoldaý jaǵy kúsheıe túspek. ıAǵnı, daýys berý erekshelikteri men proportsıonaldy-majorıtarlyq saılaý júıesin túsindirý qaıta ózektendiriledi. Buǵan deıin ótken saılaýlar nátıjesinde áıelder men jastarǵa arnalǵan 30 paıyzdyq kvota týraly norma iske qosylyp, parlamenttik oppozıtsııa ınstıtýty engizilgenin atap ótken jón», - dedi Janar Sanhaeva.

Onyń túıindeýinshe, Májilis jáne máslıhat depýtattary saılaýy jańasha jaǵdaıda ótedi.

«Jańashyldyq dep otyrǵanymyz, saıası partııalardy tirkeýde músheler sanynyń azaıýy. Bul jańa partııalyq qozǵalystarǵa múmkindik berdi. Onyń dáleli «Baıtaq» jáne «Respublika» jańa partııalarynyń tirkelýi. Partııa qurýdaǵy jańa rásimnen basqa, olardyń Parlamentke ótýine qatysty shekteýler azaıdy. Kandıdattarǵa talap bir mandatty saılaý okrýgi boıynsha belgilenedi. Osylaısha bir mandatty kandıdattar Májilistegi 29 depýtattyq orynǵa talasady»,- deıdi ol.

Sondaı-aq, sarapshy óńirlik deńgeıde belsendi saılaý naýqany kútiletinin jetkizdi.

«Oblystar men Astana, Almaty jáne Shymkent qalalary máslıhattarynyń depýtattary partııalyq tizimder boıynsha da, bir mandatty okrýgter boıynsha da saılanady. Al aýdandyq máslıhattardyń depýtattary tek bir mandatty okrýgter boıynsha synǵa túsedi»,- dep túsindirdi J. Sanhaeva.

Eske salsaq, búgin Memleket basshysy jetinshi saılanǵan QR Parlamentiniń Májilisin taratý jáne QR Parlamenti Májilisi depýtattarynyń kezekten tys saılaýyn taǵaıyndaý týraly Jarlyqqa qol qoıdy.

Májilis depýtattaryn kezekten tys saılaý 19 naýryzǵa belgilendi.

Odan bólek, Memleket basshysy barlyq deńgeıdegi máslıhattardyń ókilettigin toqtatý týraly Jarlyqqa qol qoıdy.

Memleket basshysy Qasym-Jomart Toqaev Parlament Májilisi jáne máslıhat depýtattarynyń kezekten tys saılaýyn taǵaıyndaý týraly málimdeme jasady.