Sarapshy máslıhat depýtattyǵyna kandıdattar úshin úgit-nasıhattyń qaı túri tıimdi ekenin aıtty

ASTANA. QazAqparat – Aldaǵy saılaý naýqany elektorat úshin saıası básekelestik rýhynda ótedi deýge bolady. Bul pikirdi QR Prezıdenti janyndaǵy Qazaqstannyń strategııalyq zertteýler ınstıtýtynyń elektoraldy úderisterdi zertteý bólimi jetekshisiniń mindetin atqarýshy Janar Sanhaeva aıtyp otyr, dep habarlaıdy QazAqparat tilshisi.

«Qazir saılaýaldy naýqannyń ekinshi aptasy ótip jatyr. Bul kandıdattardyń kóbi óz baǵdarlamasyn belsendi ilgeriletip jatqanyn kórsetedi. Internet resýrstary men áleýmettik jelilerge kóp kóńil bólinip jatyr. Atalǵan quraldar kandıdattardyń qoǵammen jumys isteýine keń múmkindik beredi. Tıimdi ári jyldam áreket etýde, saılaýaldy baǵdarlamalardyń negizgi tezısterin jetkizýde áleýmettik medıanyń paıdasy mol. Mysaly, kandıdattar tikeleı efır arqyly óz baǵdarlamalaryn tanystyra alady. Alaıda, máslıhat depýtattyǵyna úmitkerler úshin saılaýaldy úgit materıaldaryn taratyp, úıdi aralaý tehnologııasy oń nátıje beredi», - dedi Janar Sanhaeva.

Sarapshynyń aıtýynsha, elektoratqa partııalyq básekelestik neǵurlym túsinikti ári jaqyn. Bul bir mandatty kandıdattarǵa óz okrýginiń saılaýshylarymen belsendi jumys isteý qajettiligin kórsetedi.

«Pikirtalas – daýys berýshilerge negizgi máseleler boıynsha kandıdattardyń pozıtsııasyn salystyrýǵa múmkindik beretin saılaý naýqanynyń mańyzdy bóligi. Sondyqtan naýqan barysynda ártúrli formattaǵy pikirtalastardyń ótýi mańyzdy. Ótken pikirtalas partııalardyń daıyndyǵynyń jaqsy deńgeıin kórsetti. Jalpy, debat qorytyndysy boıynsha bıyl saılaý jarysy elektorat úshin saıası básekelestik rýhynda ótetinin atap ótýge bolady. Barlyq partııa jeńiske jetýge múddeli», - deıdi ol.