Sarapshy kómirdiń Ortalyq Azııa elderindegi aýa sapasyna qalaı áser etip otyrǵanyn aıtty

ASTANA. QazAqparat – Ortalyq Azııa elderindegi aýa sapasyn kómir jaǵatyn nysandar nasharlatyp jatyr. Bul týraly elordada Ortalyq Azııa elderiniń aýa sapasy máselesine arnalǵan konferentsııada Tájirıbeshil ekologter qaýymdastyǵynyń basshysy Laýra Malıkova aıtty, dep habarlaıdy QazAqparat tilshisi.

«Ortalyq Azııa elderiniń ishinde Qazaqstanda ónerkásip nysandary kóbirek kezdesedi. Atap aıtqanda, bul kásiporyndar arasynda aýany lastaý jaǵynan jylý elektr ortalyqtary birinshi orynda. Sebebi, olarda negizinen kómir jaǵylady. Ekinshi orynda taý-ken metallýrgııa sektory tur», - dedi L. Malıkova.

Sonymen qatar, ol elimizdiń soltústik, ortalyq, shyǵys óńirlerindegi jeke turǵyn úılerdiń basym bóliginde kómir jaǵylatynyn, osy oraıda jeke sektor da aýa sapasyna áser etip otyrǵanyn aıtty.

«Sondyqtan, bul óńirlerge gaz tartý áreketi iske asyrylyp jatyr. Qazir elordadaǵy jeke sektordyń birazyna gaz qosyldy. Bul turǵyda qaladaǵy tútin birtindep azaıyp keledi.

Turǵyndardyń kóbi aýany negizinen avtokólik lastaıdy degen pikirde ekenin anyqtadyq. Alaıda, tıisti málimetterdi salystyra kele, atmosferaǵa shyǵarylǵan zııandy zattar boıynsha kómir negizgi lastaýshy bolyp tur. Qazaqstanda jáne Ortalyq Azııadaǵy basqa da elderde jylý berý kezeńinde aýa sapasy nasharlaıdy», - dedi Laýra Malıkova.

Aıta keteıik, Qazaqstandaǵy elektr energııasynyń 70%-y kómirden, 20%-y gazdan, 3%-y jańartylatyn kózderden (JEK), qalǵany – sý kózderinen óndiriledi.

Budan buryn habarlanǵandaı, Energetıka mınıstri Bolat Aqsholaqov shyǵys óńirdi gazdandyrýdyń 2 nusqasyn atady.