Sarapshy Qazaqstannyń baspana naryǵyndaǵy jaǵdaıǵa qatysty pikir bildirdi

ASTANA. QazAqparat – Qazaqstan Rıeltorlary birlesken qaýymdastyǵy prezıdentiniń keńesshisi Nına Lýkıanenko baspana naryǵyndaǵy jaǵdaıǵa qatysty pikir bildirdi, dep habarlaıdy QazAqparat tilshisi.

«Qazir naryqtaǵy ahýal buǵan deıingi eki aıdaǵy jaǵdaıdan esh aıyrmashylyǵy joq. Kelisimsharttar standartty rejımde júrgizilip jatyr. Osy oraıda baǵanyń kúrt kóterilýi men ózgerýi baıqalmady», - dedi Nına Lýkıanenko QazAqparat agenttigine bergen jaýabynda.

Onyń aıtýynsha, qazirgi kezde el boıynsha aıyna 33-36 myń kelisimshart jasalyp keledi.

Bul turǵyda ol taıaý aılarda turǵyn úı naryǵynda eleýli ózgerister bola qoımaıtynyn aıtty.

«Kelisimsharttar sany aıyna el boıynsha 33-36 myń shamasynda saqtalýy múmkin. Jańadan engizilgen ıpotekalyq baǵdarlamalar óte shekteýli jáne qazirgi naryqtyń úrdisine aıtarlyqtaı áser etpeıdi. Eger jaqyn arada memlekettik organdar qoldaý kórsetý baǵytynda qadamdar jasamasa, naryqta eleýli ózgeris bolmaıdy», - dedi Nına Lýkıanenko.