Sarapshy Qazaqstanǵa jylqy etiniń ımporttalýyna qatysty pikir bildirdi
Tóleýtaı Raqymbekov QazAqparat agenttiginiń Qazaqstanǵa Argentına, Bolgarııa, Islandııa, Meksıka, Mońǵolııa jáne Ýrýgvaıdan jylqy eti ımporttalatyny týraly aqparatyn oqyǵan jáne soǵan qatysty halyqtyń jazǵan synı pikirlerine tańǵalǵan.
«Nege uıat, masqara bolýy kerek? Kásipkerler 1,7 myń tonna et ákelgen eken, bul shamamen 7 myń bas mal. Onda turǵan ne bar? Bizdiń elimizde 2 mıllıonnan astam jylqy maly bar. 1991 jyldan beri jylqy malyn kóbeıtýmen aınalysyp kelemiz», - dep jazdy Tóleýtaı Raqymbekov Facebook-tegi óz paraqshasyna.
«Jylqy etin ımporttaý - kásipkerlerdiń marketıngtik tásili. Bizge et eksporttaǵan elderde adamdar jylqy etin múldem jemeıdi, sondyqtan da olarda jylqy eti bizdikinen 3-4 ese arzan. Nege aqsha tappasqa? Ekinshiden, syrttan jylqy etin tek óńdeýge ǵana ákeledi», - deıdi sarapshy.
Raqymbekovtyń pikirinshe, jylqy etin asyp jeýdi unatatyn qazaqtar jáne jalpy qazaqstandyqtar ımporttyq jylqy etin jemeıdi.
«Bizdegi jylqy eti men ımporttyq ettiń, tipti bizge jaqyn mońǵolııalyq ettiń dámi jer men kókteı. Bir tájirıbeli maman Mońǵolııadan et ımporttaımyn dep shyǵynǵa ushyraı jazdaǵan. Qazaqstandyqtar mońǵolııalyq jylqy etin satyp almaıdy. Al ózimizdegi jylqy eti delıkateske aınaldy, bir jylqynyń ózi 350-380 myń teńgege satylady», - dep túsindirdi Tóleýtaı Raqymbekov.
Ósimdik maıyn ımporttaýda da dál osyndaı jaǵdaı oryn alyp otyr.
«Birinshiden, palma maıy bizdegi kúnbaǵys maıynan eki esege arzan. Ekinshiden, bizde ekzotıkalyq maı túrlerine, máselen záıtún maıyna qyzyǵatyndar bar. Bizde záıtún óspeıdi, banan da, apelsın de óspeıdi! Ne isteý kerek? Importtaımyz. Áıtse de, kúnbaǵys maıyn óndirý boıynsha ózimizdi-ózimiz qamtamasyz etip otyrmyz. Tipti Eýropaǵa jarty mıllıon tonna maı eksporttadyq», - dep atap ótti ol.
«Sondyqtan, bázbireýler oılaǵandaı aýyl sharýashylyǵyndaǵy jaǵdaıymyz nashar emes. Árıne, máseleler jetip artylady. Biraq, Jeglov aıtqandaı: «Máseleniń bolýy qorqynyshty emes, sol másele sheshilmeı jatsa, sodan qorqý kerek». Shamamen osylaı», - dep túıindedi Tóleýtaı Raqymbekov.
