Sarapshy Qazaqstanda lastanǵan qalalardy atady
NUR-SULTAN. QazAqparat - Elordada aýa sapasyna arnalǵan konferentsııada Tájirıbeshil ekologtar qaýymdastyǵynyń tóraǵasy Laýra Malıkova lastanǵan qalalar týraly pikir bildirdi, dep habarlaıdy QazAqparat tilshisi.
«Qazgıdromet» turǵyn úıler ornalasqan jerlerde aýanyń sapasyna monıtorıng júrgizedi. Osy monıtorıng nátıjesi boıynsha bizde túrli lastaýshy zattarǵa qatysty ruqsat etilgen kontsentratsııanyń shekti deńgeıinen asyp túsken qalalardyń tizimi anyqtaldy. Mysaly, Qazaqstannyń ortalyq, shyǵys, soltústik bólikterinde kóbine qalqymaly zattar, ıaǵnı kómir jaǵýdan bólinetin PM 2,5, PM10 kezdesedi», - dedi L. Malıkova «Ortalyq Azııadaǵy aýa sapasyna monıtorıng» atty konferentsııa barysyndaǵy baspasóz máslıhatynda.
Osy oraıda ol elordada, Almatyda kómirden gaz jaǵýǵa kóshý jumystary júrip jatqanyn eske saldy.
«Al Aqtóbe, Atyraý qalalarynda kúkirtsýtek jáne ushpa organıkalyq qospalar boıynsha ruqsat etilgen kontsentratsııanyń shekti deńgeıinen asyp túsý jaǵdaılary baıqalyp otyr. Bul rette Atyraý munaı óńdeý zaýyty da aýa sapasyna yqpal etedi. Balqash qalasynda da lastaýshy zattardyń shekti deńgeıden asýy tirkelip jatady» - dedi qaýymdastyq tóraıymy.
Onyń aıtýynsha, Shymkent qalasy da lastanǵan qalalardyń qatarynda. Bul qalada eski avtokólikterdiń úlesi joǵary bolyp tur. Óskemende de lastaný jaǵynan másele bar. Osy shaharda iri óndiristik kásiporyndar óziniń áserin tıigizip jatyr.
«Elordadaǵy aýa sapasyna toqtalsaq, qalada jeke sektordyń úlesi zor. Olar kóbine kómir jaǵady. Sońǵy jyldary birtindep gazǵa qosý jumystary júrip jatyr, alaıda úılerdiń birazy kómir jaǵady», - dedi ol.
Budan buryn habarlanǵandaı Laýra Malıkova elordada aýanyń lastanýyna qandaı faktor áser etetinin aıtqan edi.
Sonymen qatar Qazaqstanda avtokólikti tehnıkalyq baıqaýdan ótkizýge qatysty jaýapkershilik kúsheıtiledi.
