Sarapshy Qazaqstan men Ózbekstan yntymaqtastyǵyn jandandyratyn faktorlardy atady
NUR-SULTAN. QazAqparat - QR Prezıdenti janyndaǵy Qazaqstannyń strategııalyq zertteýler ınstıtýtynyń bas ǵylymı qyzmetkeri Vıacheslav Dodonov Memleket basshysy Qasym-Jomart Toqaevtyń Ózbekstanǵa saparyna oraı pikir bildirdi, dep habarlaıdy QazAqparat tilshisi.
«Qazaqstan Respýblıkasynyń Prezıdenti Qasym-Jomart Toqaevtyń 14-15 sáýirde Ózbekstan Prezıdenti Sh. Mırzıeevtyń shaqyrýymen jasaǵan Ózbekstanǵy sapary eki eldiń ekonomıkalyq yntymaqtastyǵyn jandandyrýǵa baǵyttalǵan. Bul yntymaqtastyq osydan biraz ýaqyt buryn birqatar obektıvti jáne sýbektıvti sebepterge baılanysty qıyndaý bolǵan edi. Degenmen qazirgi ýaqytta eki eldiń de obektıvti múddelerine negizdelgen damý qarqyn alyp keledi», - dedi ol.
Onyń paıymynsha, taıaý ýaqytta eki eldiń arasyndaǵy ózara saýdadaǵy yntymaqtastyq jandana túsetin bolady.
«Eger 2017 jyly Qazaqstan men Ózbekstannyń taýar aınalymy 1 mlrd 985 mln dollar bolsa, 2018 jyly ol 2 mlrd 488 mln dollarǵa deıin artty. Memleket basshysy sapar barysynda ózara taýar kólemin jedeldetýge jáne 2020 jyldyń qorytyndysynda onyń kólemin 5 mlrd dollarǵa deıin jetkizýge, ıaǵnı 2018 jylǵy deńgeıden eki ese joǵarylatýǵa nıetti ekendigin bildirdi», - dedi sarapshy.
Onyń sózine qaraǵanda, ózara saýda kólemin arttyrýǵa eki memleketterdiń bir-birine jaqyndyǵy, kóliktik-logıstıkalyq alymdardyń tómendigi septigin tıgizedi. Nátıjesinde eki eldiń de naryǵy baǵasy arzan sapaly ónimdermen qamtamasyz etiledi. Bul óz kezeginde eki eldiń de turǵyndary úshin oń áleýmettik-ekonomıkalyq áser beredi. Sonymen qatar Qazaqstan men Ózbekstannyń ınvestıtsııa, ınfraqurylymdyq damý, shekara mańy yntymaqtastyǵy, týrızm syndy salalardaǵy yntymaqtastyqty damytýǵa da múmkinshiligi mol.
«Bul salalardaǵy kooperatsııa áleýetin júzege asyrý úshin naqty qadamdar sapar barysynda jasaldy. Atap aıtqanda, «Ortalyq Azııa» halyqaralyq saýda-ekonomıkalyq yntymaqtastyq ortalyǵyn qurý máselesi boıynsha ózara túsinistik týraly memorandýmǵa qol qoıyldy. Ekijaqty vedomstvoaralyq jumys toby qurylyp, Qazaqstan Prezıdenti Túrkistan, Samarqand jáne Buqarany biriktiretin transshekaralyq týrıstik klaster qurý týraly usynys jasady», - dedi ol.
