Sarapshy Qazaqstan quramasynyń 2024 jylǵy Eýropa chempıonatyna shyǵý múmkindigine boljam jasady
ASTANA. QazAqparat - Sport jýrnalısi jáne ınsaıder Aıdyn Qojahmet fýtboldan Qazaqstan quramasynyń 2024 jylǵy Eýropa chempıonatyna shyǵý múmkindigi jóninde pikir bildirdi, dep habarlaıdy QazAqparat tilshisi.
«Men Qazaqstan quramasynyń belarýs fýtbolshylarynan basym túskenin durys qabyldadym. Oǵan esh tańǵalǵan joqpyn. Óıtkeni, bizdiń qurama ár oıyn saıyn kúsh qosty. Senimdiligi arta tústi. Bálkim, mundaı sezim maǵan qazaqstandyq quramanyń atalǵan qarsylasyn jeńetinine aldyn ala senimdi bolǵanymnan kelgen shyǵar. Oıynǵa deıin oǵan esh kúmánim bolǵan joq. Belarýs quramasynyń deńgeıi bizben qatarlas. Sheberlik jaǵy birdeı. Árıne, topta bizdiń birinshi, olardyń tórtinshi oryn alǵanynyń buǵan qatysy joq. Bul - fýtbol. Munda keıde kezdeısoqtyq bop turady, keıde sáttilik joldas bolady», - dedi Aıdyn Qojahmet.
Ol Qazaqstan quramasynyń 2024 jylǵy Eýropa chempıonatyna shyǵý múmkindigi jaıynda oı qozǵady.
«Eger dál osyndaı kórsetkishke qol jetkize alsaq, ol tańǵajaıyp oqıǵa bolar edi. Matematıkalyq turǵydan alǵanda, asa qıyn kórine qoımas. Ol úshin eki márte jeńiske jetsek jetip jatyr. Alaıda, bul oraıda qarsylastyń osal bolmaıtynyn eskerýimiz qajet. Sondyqtan onyń ońaıǵa soqpaıtynyn ańǵarý qıyn emes. 2024 jyly bizdiń quramanyń deńgeıi qandaı bolady? Ol ýaqytta quramada kimder oınaıdy, kim bapkerlik jasaıdy? Bálkim, biz myqty bolarmyz nemese kerisinshe. Naqty aıtqanda, qazir bizdiń qurama senimdi oıyn jáne jınaqy qımyl kórsetip júr. Bul maǵan unaıdy», - dedi ol.
Aıdyn Qojahmet Belarýske qarsy kezdesýde jaqsy oıyn órnegin kórsetken fýtbolshylardy atap ótti.
«Aıta keteıin, bapkerler quramy quramaǵa fýtbolshylardy qandaı talappen shaqyratynyn ózi biledi. Ol jaıynda eshteńe aıta almaımyn. Desem de, áli de quramaǵa qarqyn qosatynyn birqatar fýtbolshylar bar ekenin jasyrmaımyn. Olardyń qatarynda «Aqtóbe» klýbynan Stas Pokatılov, Baýyrjan Baıtana, Álibek Qasymdy atap ótýge bolady. Sondaı-aq, «Ordabasy», «Taraz» jáne ózge klýbtarda sheberligi shyńdalǵan jastar bar. Men olardyń barlyǵyna múmkindik beriledi degen oıdamyn. Quramaǵa tyńnan oıynshylar qosqan artyq emes. Ótken oıynnan Ramazan Orazovty atap óter edim. Ol kezdesýdi belsendi ótkizdi. Bahtıer Zaınýtdınov te kóp kúsh jumsady. Oǵan Aleksandr Marochkındi qosa alamyz. Negizinde barlyǵy joǵary deńgeıde kórindi. Sapaly jáne senimdi oınady», - dep oıyn tolyqtyrdy Aıdyn Qojahmet.
Eske salsaq, el quramasy 22 qyrkúıekte óz alańynda Belarýsti súrindirdi.
Atalǵan jeńisten keıin Qazaqstan Prezıdenti Qasym-Jomart Toqaev quttyqtaý jedelhatyn joldady.
Osylaısha qazaqstandyq fýtbolshylar bir týryn buryn V dıvızıonyna berilgen joldamaǵa ıe boldy.
Odan keıin Qazaqstan quramasynyń bas bapkeri Magomed Adıev buǵan baılanysty pikir bildirdi.
Sondaı-aq, sport jýrnalısi ári kommentator Petr Volıkov Qazaqstan quramasynyń Eýro-2024-ke shyǵý múmkindigi jóninde oı qozǵady.
