Sarapshy: Qazaqstan ekologııalyq turaqtylyq maqsatyn oryndamady
ASTANA. QazAqparat - Qazaqstan ekologııalyq turaqtylyq boıynsha Myńjyldyq damý maqsatyn tıisti mejege jetkizgen joq. Bul týraly búgin Parlament Májilisindegi «Ornyqty damý jáne Parıj kelisiminiń maqsattyryn iske asyrýdy zańnamalyq qamtamasyz etý» taqyrybyndaǵy konferentsııada ornyqty damý salasyndaǵy halyqaralyq sarapshy Bolat Esekın málim etti, dep habarlaıdy QazAqparat.
«Myńjyldyqtyń kóptegen maqsattaryn Qazaqstan oryndady. Máselen, kedeıshilikti joıý maqsaty bolǵan edi jáne ol 2004 jyly oryndaldy. Jalpyǵa ortaq bastapqy bilim baǵytyndaǵy kózdelgen maqsat mejesine jetti. Genderlik teńdik, quqyqtardy keńeıtý jalpy alǵanda oryndaldy... Alaıda, Qazaqstan oryndamaǵan jalǵyz maqsat - ol ekologııalyq turaqtylyqty qamtamasyz etý»,-dedi Bolat Esekın.
Osy rette ol qaldyqtar men shyǵaryndylar kólemi, qorshaǵan ortany lastaý, shóleıttený sekildi parametrler ósip kele jatqanyn atap ótti. Sondyqtan da ekologııalyq turaqtylyq turǵysynda bul maqsatty eńserýge ekpin qoıý kerek bolyp tur.
Myńjyldyq damý maqsattary aıasynda negizgi segiz maqsat-mindet qamtylǵan jáne oǵan BUU-ǵa múshe 193 memleket pen 23 halyqaralyq uıym 2015 jylǵa qaraı qol jetkizýge ýáde etti. Osy oraıda joqshylyq aýqymyn, balalar ólim-jitimin tómendetý, epıdemııalyq aýrýlarmen kúres sekildi baǵyttar qamtylǵan.
