Sarapshy: Qasym-Jomart Toqaevqa saıasatker retinde qoǵamdyq mandat berilip otyr
«Keshe túngi on ekide Exit poll-dyń málimdemesin kórdik. Sol málimdemege qaraǵanda Toqaev Qasym-Jomart Kemelulynyń basym paıyzben, kóp daýyspen prezıdenttik saılaýda jeńiske jetken syńaıy bar. Búgingi Ortalyq saılaý komıssııasynyń resmı málimdemesinde úlken aıyrmashylyq bolmaıdy dep esepteımin. Qasym-Jomart Toqaevtyń osy saılaýda jeńiske jetýi - menińshe, obektıvti másele. Sebebi, onyń artynda Qazaqstandaǵy eń úlken ári eń yqpaldy elektoraty, Nursultan Nazarbaev jetekshilik etetin «Nur Otan» partııasy tur. Sondyqtan, Qasym-Jomart Toqaevtyń úlken elektoraty óziniń kandıdatyna daýys berdi dep esepteımin», - dedi sarapshy elordada tilshilerge bergen suhbatynda.
Ánýar Shotbaı Qasym-Jomart Toqaevtyń eń bedeldi de tájirıbeli, yqpaldy saıasatkerlerdiń biri ekenin atap ótti.
«Biz búgin kóretin saılaý qorytyndysyn Toqaevqa saıasatker retinde berilgen qoǵamdyq mandat dep esepteýge tolyq negiz bar. Jalpy, osy saılaý naýqanynda úmitkerlerdiń shtabtary qalaı jumysty júrgizgenine bárimiz kýámiz. Osy naýqan aıasynda eń belsendi, eń qyzyqty saılaý naýqanyn uıymdastyra bilgeni - Toqaevtyń shtaby ekeni barshaǵa aıan. Nege deseńizder, áleýmettik jelilerde, aýyldar men aýdandarda, oblystar men qalalarda, JOO-larda kóppen kezdesip, áleýmettik toptardy tolyq qamtyǵan menińshe, Qasym-Jomart Toqaevtyń shtaby ǵana. Sol sebepti, osy saılaý naýqanynda basym daýyspen jeńiske jetse - ol obektıvti másele», - dedi sarapshy.
Aıta ketken jón, Exit poll nátıjesi boıynsha 9 maýsymda ótken QR Prezıdentiniń kezekten tys saılaýy barysynda saılaýshylardyń 70,13 protsenti kandıdat Qasym-Jomart Toqaevqa daýys bergen edi.
Eske sala ketsek, keshe Qazaqstan Prezıdentin kezekten tys saılaýy ótti.
QR Prezıdentiniń kezekten tys saılaýynda el ishinde jáne shet elderde 9 968 daýys berý ýchaskesi jumys istedi. Saılaý týraly Konstıtýtsııalyq zańǵa sáıkes, daýys berý ýaqyty standartty (saǵat 7.00-20.00 aralyǵy) boldy.
