Sarapshy: Qasym-Jomart Toqaev eldiń túıtkildi máselelerimen etene tanys ekenin kórsetti

NUR-SULTAN. QazAqparat - Eýrazııa ıntegratsııa ınstıtýtynyń qyzmetkeri Dáýren Bazarov Prezıdent kandıdatýrasyna Qasym-Jomart Toqaevtyń usynylýyna qatysty pikir bildirdi, dep habarlaıdy QazAqparat tilshisi.

««Nur Otan» óziniń XIX sezinde partııa Tóraǵasynyń usynysymen Qasym-Jomart Toqaevty Qazaqstan Respýblıkasy prezıdenttigine úmitker retinde biraýyzdan maquldady. Sezd jumysyna qatysqan 263 delegattyń ishinde qalys qalǵany joq. Osynyń ózi músheleriniń sany jaǵynan da, qoǵamǵa yqpaly jaǵynan da eń bedeldi saıası uıymnyń ishinde bóliný, jiktelý sııaqty jaǵymsyzdyqtardyń joqtyǵyn, kózqarastar birligi men ustanymdar tutastyǵy ústemdigin kórsetedi», - dedi Dáýren Bazarov QazAqparat tilshisine.

Sarapshynyń aıtýynsha, Elbasy óz sózinde Qasym-Jomart Kemelulyn óziniń úzeńgiles serigi, álemdik deńgeıdegi jumys tájirıbesine ıe dıplomat jáne bilimi men biliktiligi bıik, búginge deıin atqarǵan qyzmette kásibı tájirıbesi jetkilikti saıasatker ekenin atap ótken.

«Qasym-Jomart Kemeluly Prezıdent retinde óziniń óńirlerge jáne kórshiles memleketterge jasaǵan saparlary men kadrlyq taǵaıyndaýlary arqasynda halyqtyń, eldiń túıtkildi máselelerimen etene tanys ekendigin kórsetip berdi. Sondaı-aq, osy baǵyttaǵy áserli jumysyn odan ári jalǵastyrady dep senemiz. Desek te ózge partııalar men qoǵamdyq uıymdar saılaýǵa qandaı úmitkerlerdi úkilep otyrǵandary belgisiz. Sondyqtan saılaýshylar óz tańdaýyn barlyq úmitkerler aıqyndalyp, baǵdarlamalary jarııalanǵannan keıin ǵana jasaıtyn bolady», - deıdi Dáýren Bazarov.

Eske sala ketsek, «Nur Otan» partııasy búgingi kezekten tys sezde Qasym-Jomart Toqaevtyń kandıdatýrasyn biraýyzdan qoldap, daýys bergen bolatyn.

Óz kezeginde QR Prezıdenti Qasym-Jomart Toqaev aldaǵy prezıdenttik saılaýǵa kandıdat retinde qatysatynyn málim etti.