Sarapshy: Karantın rejımin buzǵandarǵa 83 myń teńge aıyppul - májbúrli shara
NUR-SULTAN. QazAqparat – Karantın rejımin buzǵan qazaqstandyqtarǵa aıyppuldardy bekitý – májbúrli sharalardyń biri. Bul pikirdi QR Prezıdenti janyndaǵy Qazaqstan strategııalyq zertteýler ınstıtýtynyń bólim basshysy Alýa Joldybalına bildirdi, dep habarlaıdy QazAqparat tilshisi.
«Búgin Qazaqstanda memlekettik komıssııanyń shekteý sharalaryn eńgizý týraly sheshimi jarııalandy. Karantındik rejımdi buzǵan jaǵdaıda, qazaqstandyqtar úshin jańa aıyppuldardy bekitý – mańyzdy sharalardyń biri. Karantın rejımi men sanıtarlyq-epıdemıologııalyq talaptar buzylǵan jaǵdaıda jeke tulǵalar 30 AEK nemese 83 340 teńge (shamamen 204 dollar), kásipkerlik sýbektileri 230 AEK nemese 638 940 teńge (shamamen 1560 dollar) jáne odan joǵary ákimshilik jaýapkershilikke tartylady. Buǵan deıin koronavırýs boıynsha karantın rejımin buzǵany úshin 5 AEK kóleminde aıyppul salyndy», - deıdi sarapshy.
Onyń aıtýynsha, kóptegen elder óz azamattaryn tártipke keltirý úshin osy májbúrli sharany engizýde. Mysaly, 29 maýsymda Ázerbaıjan Parlamenti sanıtarlyq-gıgıenalyq jáne karantın rejımin buzǵany úshin aıyppul mólsherin bekitti. Jeke tulǵalar 200-400 manat aralyǵynda (100-200 dollar), laýazymdy tulǵalar – 3-4 myń manatqa deıin (1500-2000 dollarǵa deıin) aıyppul tóleıdi. Áleýmettik jaýapkershilikti arttyrý maqsatynda Ázerbaıjanda aıyppul somasy 2 esege artty.
«Birqatar elde maska rejımin buzǵany úshin de aıyppul salynady. Túrkııada 22 maýsymnan bastap maska kııý talaptaryn buzǵany úshin 900 lıra (130 AQSh dollarynan astam) aıyppul tóleıdi. Argentına qoǵamdyq oryndarda maskanyń joqtyǵy úshin 500 myń pesoǵa (shamamen 7 myń dollar) aıyppul salýǵa nıetti. Ýkraına úkimeti azamattardyń maska kııý talaptaryn oryndamaǵany úshin arnaıy jaýapkershilik belgilenetin zań jobasyn maquldady», - dedi QSZI ókili.
Kórshiles Reseıde maska-qolǵap rejımin buzǵany úshin de aıyppul belgilengen: kólikte – 5 myń rýbl (70 dollar), kósheler men úı-jaılarda – 4 myń rýbl (56 dollar).
«Italııa úkimeti de karantındi buzǵandarǵa jazany kúsheıtý máselesin talqylaýda, atap aıtqanda, aıyppuldy 3000 eýroǵa deıin ulǵaıtpaq. Qazirgi ýaqytta Italııadaǵy aıyppul somasy 206 evrony quraıdy. Biz úshin de qazir áleýmettik qashyqtyq, maska rejımin saqtaý asa mańyzdy. Aıyppul da osy saqtyq sharalaryn kúsheıtý úshin engizilgen», - dedi Alýa Joldybalına.
Eske salaıyq, búgin Memlekettik komıssııa epıdemıologııalyq jaǵdaıdy turaqtandyrý jónindegi sharalardy bekitken bolatyn. Oǵan sáıkes, bıylǵy 5 shildeden bastap elimizde 14 kúnge birqatar shekteý sharalaryn engizý sheshimi qabyldandy.
Al karantın talaptaryn buzǵan jeke jáne zańdy tulǵalarǵa aıyppul salynady.
Sondaı-aq buǵan deıin Eýropa elderinde pandemııaǵa baılanysty engizilgen talaptardy buzǵany úshin qarastyrylǵan aıyppul somalaryn jazǵan edik.
