Sarapshy: Islam Kárimov bılikten ketken jaǵdaıda Ózbekstannyń syrtqy saıasatynda eshteńe ózgermeıdi
ALMATY. QazAqparat- Islam Kárimov bılikten ketken jaǵdaıda Ózbekstannyń syrtqy saıasatynda eshteńe ózgermeıdi. Búgin «QazAqparat» tilshisine bergen suhbatynda Qazaqstannyń strategııalyq zertteýler ınstıtýtynyń burynǵy dırektory, saıasatker Bolat Sultanov osyndaı pikir bildirdi.
«Islam Ábdýǵanıuly Kárimovtiń aıyǵyp ketýine tilektespiz. Biraq, ishki jáne syrtqy saıasattyń barysy qandaı da bir dárejede el tizginen ustaǵan tulǵalardyń densaýlyǵyna baılanysty bolatyny belgili. Sondyqtan, Ózbekstan Prezıdentiniń aýrýhanaǵa jatqyzylǵany týraly aqparatqa baılanysty qaýesetter kóbeıip ketti. Óıtkeni, ádettegideı biletinder úndemeıdi, al bilmeıtinder qaýeset taratyp, jalǵan pikir qalyptastyrady. Sondyqtan, Ózbekstan tarıhyndaǵy bul kezekti oqıǵanyń qalaı aıaqtalatyny týraly naqty birdeńe deý qıyn», - dedi B. Sultanov.
Onyń pikirinshe, Ózbekstan - Ortalyq Azııa óńirinde mańyzdy memleketterdiń biri.
«Qazir, Ózbekstandaǵy bılik muragerligine qatysty eki pikir bar. Biri Ózbekstanda Premer-mınıstr Shavkat Mırzııaevtiń el tizginin ustaıtyndyǵy jaıly bolsa, ekinshisi Prezıdenttiń qyzy Gúlnar Kárimovanyń bılikke keletindigi jaıly. Deıturǵanmen, ol bıliktiń muragerliginen alastatylǵan. Biraq, Ortalyq Azııada ómir súremiz ǵoı. Sondyqtan, barlyǵy ózgerýi múmkin», - dedi sarapshy.
Onyń pikirinshe, qazirgi jaǵdaıda boljam jasaý óte qıyn.
«Bul Shyǵys qoı. Birinshi qyrkúıekke deıin qandaı da bir boljam jasaý óte qıyn. Óıtkeni, 1 qyrkúıek - Ózbekstannyń táýelsizdik kúni», - dedi saıasatker.
Sonymen qatar, ol eldiń amandyǵy, qaýipsizdigi bir adamnyń densaýlyǵyna táýeldi bola almaıtyndyǵyn aıtty.
«Ózbekstannyń syrtqy saıasatynda eshteńe ózgermeıdi. Óıtkeni, Ortalyq Azııanyń basqa da elderi sekildi Reseı men Qytaı jáne Islam álemi arasynda ornalasqan. Biraq, qandaı da bir taktıkalyq ózgerister oryn alýy múmkin», - dedi ol.
Onyń pikirinshe, Qazaq-ózbek qarym-qatynasy dostyq sıpatta qala bermek.
«Qazaqstan men Ózbekstan Ortalyq Azııada kóshbasshylyqqa talasyp jatyr» degen pikir jıi aıtylady. Munyń barlyǵy beker sóz», - dedi B. Sultanov.
Al, Ózbekstan Prezıdentiniń baspasóz qyzmetinde Islam Kárimovtiń densaýlyǵyna qatysty jańa derekter aıtylǵan joq.
Esterińizge sala ketelik, 78 jastaǵy Ózbekstan Prezıdenti Islam Kárimov aýrýhanaǵa jatqyzyldy. Bul týraly tuńǵysh ret resmı túrde habarlandy.
Mınıstrler kabınetiniń habarlaýynsha, medıtsınalyq tekserý júrgizýge jáne emdelýge belgili bir ýaqyt kerek».
