Sarapshy: Elimizdegi jemqorlyqty joıý - Prezıdenttiń naqty ustanymy

NUR-SULTAN. QazAqparat - Eýropalyq quqyq jáne adam quqyqtary ınstıtýtynyń dırektory Marat Báshimov QR Prezıdenti Qasym-Jomart Toqaevtyń sybaılas jemqorlyqqa qarsy kúres máseleleri jónindegi keńeste sóılegen sózine oraı pikir bildirdi, dep habarlaıdy QazAqparat tilshisi.

«Búgin Prezıdent Qasym-Jomart Toqaev elimizdiń ulttyq qaýipsizdigine - jemqorlyqpen kúres máselesine qatysty keńes ótkizdi. Bul óte mańyzdy. Óıtkeni, koronavırýs indetine kezinde halyq jemqorlyqtyń kez kelgen faktisin óte aýyr qabyldap otyr. Sondyqtan jemqorlyqpen kúreske baǵyttalǵan sharalar da soǵan saı júrgizilýi tıis. Memleket basshysy da: «Sybaılas jemqorlyqqa qarsy kúres – elimizdiń strategııalyq damýyndaǵy negizgi basymdyqtardyń biri« dep naqty aıtty. ıAǵnı, elimizdegi jemqorlyqty joıý - Prezıdenttiń naqty ustanymy ekendigine senimim mol», - dedi ol.

Osy rette ınstıtýt basshysy Qazaqstan bedeldi halyqaralyq GREKO uıymyna, ıaǵnı sybaılas jemqorlyqqa qarsy memleketter tobyna múshe ekendigin aıtady.

«Bul Sybaılas jemqorlyqqa qarsy is-qımyl jónindegi Eýropa keńes elderiniń tájirıbelerin qabyldaýǵa jáne olarmen yntymaqtastyqta jumys isteýge múmkindik beredi. Árıne, elimizde sybaılas jemqorlyqtyń tamyryna balta shaýyp, túbegeıli joıýǵa baǵyttalǵan jumystar júrgizilip te jatqany belgili. Máselen, qol astyndaǵylardyń jemqorlyq áreketteri úshin basshylaryn qyzmetinen bosatý qaǵıdaty engizildi. Alaıda, jemqorlyq áli de tyıylar emes. Ony kúndelikti BAQ betinen kórip, bilip otyrmyz», - dedi Marat Báshimov.