Sarapshy: Bul saılaý qoǵamnyń jańa betburysqa degen suranysyn kórsetti
«Qasym-Jomart Kemelulynyń joǵary nátıjege jetýi - bir jaǵynan zańdy. Álbette, kútkenimizdeı Ortalyq saılaý komıssııasy jarııalaǵan saılaýdyń resmı qorytyndysy - «Exit poll» saýalnamasynan asa bir alshaq bolmaǵanyna kýá boldyq. Sebebi, Qasym-Jomart Kemelulynyń saıası tulǵasynen bólek, respýblıkany aralap, saılaýaldy shtabynyń atqarǵan jumysy, sondaı-aq, oǵan qoldaý bildirip otyrǵan Elbasynyń bólekshe senimi - bunyń bári ony basqa úmitkerlerden qaraǵanda alǵa súıreıtin faktorlar dep aıtýǵa bolady», - dedi sarapshy.
Nurǵalı Nurtaı óz sózinde Qasym-Jomart Toqaev saılaýdyń ádil ótetinine kepildik bergenin, saılaý kúni halyqtyń bir kisideı belsendilik tanytqanyn aıtyp ótti.
«Saılaýdyń nátıjesin qaraıtyn bolsańyz, qalalardan góri óńirlerde belsendilik kóbirek bolǵan. Bul endi bizdiń qoǵamnyń ózgeriske, jańa betburysqa degen suranysyn kórsetip otyr. Meniń oıymsha, saılaýdyń ádildigi - elektorattyń belsendiligimen ólshenedi. Al bizdiń saılaýshylar bul saılaýǵa belsendi túrde qatysty», - dedi Nurǵalı Nurtaı.
Eske sala ketsek, búgin QR Ortalyq saılaý komıssııasy 2019 jyldyń 9 maýsymynda ótken kezekten tys prezıdenttik saılaýda kandıdattarǵa saılaýshylardyń qansha daýys bergenin jarııa etken bolatyn.
«Qazaqstan Respýblıkasy boıynsha Jambyl Ahmetbekov 167 249 daýys nemese saılaýshylardyń 1,83 protsent daýysyn, Danııa Espaeva 478 153 daýys nemese saılaýshylardyń 5,2 protsent daýysyn, Ámirjan Qosanov 1 472 733 daýys nemese saılaýshylardyń 16,02 protsent daýysyn, Tóleýtaı Rahymbekov 294 271 daýys nemese 3,2 protsent daýysyn, Amangeldi Taspıhov 190 304 daýys nemese saılaýshylardyń 2,07 protsent daýysyn, Qasym-Jomart Toqaev 6 504 054 nemese saılaýshylardyń 70,76 protsent daýysyn, Sádi-Bek Túgel 84 348 daýys nemese saılaýshylardyń 0,92 protsent daýysyn jınady», - dedi QR OSK tóraǵasynyń orynbasary Konstantın Petrov.
