Sarapshy: Bankterdiń birigýi - TMD elderine tán úrdis
«QazAqparat» tilshisine bergen suhbatynda Nıkolaı Ivchenko mundaı úrdis qazir Ýkraınada, Reseıde jáne Qazaqstanda belsendi júrip jatyr dep atap ótti.
«TMD elderinde - Reseı, Ýkraına, Qazaqstanda bankterdi shoǵyrlandyrý jáne olardyń sanyn qysqartý úrdisi beleń aldy. Daǵdarysqa deıin bankterdiń sany bul elderde tym kóp bolǵanǵa uqsaıdy. Daǵdarystan keıin, ońtaılandyrý júrýde, birigý jáne birin-biri jutyp ketý úrdisi oryn alýda. Sheteldik ınvestorlar belsendi kele bastady. Óz aktsıonerlerine aqsha aǵymyn kóbirek tarta alatyn myqty bankter ǵana qalýda. Barlyqtary únemdi bola bastady, kiristi kóbeıtýge maqsat qoıyp otyr. Al kommertsııalyq bankterdiń birigýi aktsıonerlerge qosymsha paıda ákelmek. Menińshe, bul úrdis aldaǵy 4-5 jylda áli jalǵasyn tabady», - dep túsindirdi Nıkolaı Ivchenko.
Onyń aıtýynsha, kiristi molaıtý kerek, biraq bankterdiń nesıe portfelderi baıaý ósýde. Oǵan bankterdi irilendirý, ıaǵnı kólemin arttyrý arqyly qarajat únemdeýge qol jetkizýge bolady.
«Degenmen, menińshe, munda másele bankterdiń ınvestıtsııalar men ekonomıkaǵa úles qosý turǵysynan tolymdy bolýy qajettiligine kelip tirelip tur. Bank bıznestiń damýyna úles qosýy kerek. Eger bank tutynýshylar nesıelerinen kóbirek tabys tabatyn bolsa, onyń memleket ekonomıkasyna qosatyn úlesi azaıady. Bankterdiń eldegi ónerkásiptik saıasatyn damytýda róli joǵary. Eger bank iri bolsa, ony tolymdy dep ataýǵa bolady», - dep tolyqtyrdy sarapshy.
Eske sala keteıik, elimizdiń eń iri Qazkom men Halyk bankteri birigetinderin málim etti. Forbes.kz saıtyna bergen suhbatynda Halyq bank basshysy Úmit Shaıahmetova banktiń satyp alynatynyn habarlady.
Sonymen qatar Tsesnabank pen TsentrKredıtBanki ózara birigý jóninde kelissózderdi bastap ketti. Koreıanyń Kookmin banki TsentrKredıtBankiniń 41,93% aktsııasyn Tsesnabankke satatynyn jarııa etti.
