Sarapshy: Ázerbaıjan basshylyǵy Qazaqstanmen qarym-qatynasqa erekshe mán beredi
Sarapshy Ázerbaıjan basshylyǵy Qazaqstanmen qarym-qatynasqa erekshe mán beredi dep esepteıdi.
«Bizdiń elderimiz halyqaralyq arenada, túrli halyqaralyq uıymdarda bir-birine qoldaý kórsetedi. Respýblıkalar halyqaralyq quqyq qaǵıdalaryn, áserese, terrıtorııalyq tutastyq pen memleketterdiń ishki isterine aralaspaýshylyq qaǵıdalaryn qoldaıdy. Qazaqstan Ázerbaıjannyń BUU QK turaqty emes múshesi retindegi kandıdatýrasyna qoldaý bildirdi jáne tórt jyl ótkennen keıin mundaı qoldaý ÁR tarapynan da jasaldy. Bizdiń elderimiz Túrki keńesiniń uıymdastyrýshylary, IYU aıasynda ózara yqpaldastyq baılanysta», - dedi SZO dırektory.
Onyń oıynsha, eki el de tabysty damyp kele jatqan, turaqty jáne jaýapty memleketter retinde halyqaralyq arenada óz bedelderin qalyptastyra bildi. Astana men Bakýde kólemdi halyqaralyq sharalardyń ótkizilýi de kezdeısoq emes. Bıylǵy jyly Astana sırııaaralyq dıalogtyń alańy boldy.
«Ekonomıkalyq jaǵynan bizdiń elderimiz arasynda turaqty taýar aınalymy ornaǵan, onyń ósý áleýeti bar. Qazaqstan Prezıdentiniń bıylǵy jylǵy Ázerbaıjanǵa saparynda ekonomıka taqyrybyna basymdyq berilgen bolatyn jáne biz eki el arasyndaǵy ekonomıkalyq ózara yntymaqtastyqqa yqpal etetin jańa jobalardyń bastalyp jatqanyna kýá bolyp otyrmyz», - deıdi sarapshy.
Jańa Baký-Tbılısı-Kars temirjol dálizi Qazaqstan úshin qandaı perspektıvalarǵa jol ashady degen suraqqa sarapshy onyń paıdalanýǵa berilýi tarıhı oqıǵa bolady, dep jaýap berdi.
«Bul munaıdan basqa saladaǵy múshe-memleketter esebinen júzege asyrylǵan birinshi halyqaralyq joba. Onyń irgetasy «Bir beldeý - bir jol» jobasy paıda bolmaı turǵan 2007 jyly-aq qalanǵan bolatyn. Qazir bul Qytaı bastamasyna mańyzdy tetik bolatyn daıyn ınfraqurylym. Bul jerde Qazaqstannyń mańyzy zor. Sońǵy birneshe jylda barlyq joldar boıynsha tarıfterdi sınhrondaý jumystary júrgizilip áli jalǵasyp ta keledi», - dedi SZO basshysy.
«Qazaqstan men Ázerbaıjan bir-birine Shyǵys pen Batysqa bastaıtyn qaqpa. Qazaqstannan Ázerbaıjanǵa, odan ári Grýzııaǵa bastaıtyn baǵyt -básekelestikti arttyratyn joldardyń biri. Logıstıkada jedeldilik, baǵa jáne qaýipsizdik mańyzdy. Bizdiń elderimiz osy kórsetkishter boıynsha básekege qabilettilikti arttyrýǵa taǵy biraz kúsh jumsaýy kerek», - dedi agenttikke suhbat bergen sarapshy.
Áńgime sońynda ol eki el basshylarynyń bul máselege asa kóńil bóletinin jáne Qazaqstan Prezıdentiniń Baký-Tbılısı-Kars temir jolynyń ashylý saltanatyna qatysýy sonyń aınymas aıǵaǵy ekenin atap ótti.
