Sarapshy aldaǵy aptada teńgeniń qalaı qubylatynyn aıtty
ASTANA. QazAqparat - Alparı kompanııasynyń sarapshysy Anna Bodrova aldaǵy aptada teńge baǵamynyń eń tómengi jáne joǵary deńgeıleri qandaı bolatynyn aıtty, dep xabarlaıdy QazAqparat.
"Valıýtalar boıynsha jańa aptada kútilip otyrǵan boljamdar turaqty. Barrel qymbat kezde, shıkizattyq valıýtalarǵa qaýip joq. AQSh dollary 330,15-333,00 teńge aralyǵynda saýdalanady dep topshylanýda. Eýro 354-356 teńge aralyǵynda qalady", - dedi ol.
Degenmen qańtar aıyndaǵy taǵy bir apta qorytyndylaryn qaraıtyn bolsaq, qazaqstandyq valıýta birshama belsendi boldy. AQSh dollary teńgege shaqqandaǵy baǵamy ótken aptada 0,43%-ǵa tómendep baryp jabyldy. 23 qańtar, dúısenbiniń tańǵy saýdasynda bir dollar 331,66 teńge kóleminde satyldy. Teńge osy aıdaǵy óziniń eń joǵary deńgeıine taıap qaldy, degenmen oǵan jaqyn belgide turaqtap qala almady.
"Munaı baǵasynyń joǵary bolýy, qazaqstandyq teńgege tepe-teńdik beretini anyq. Soltústikamerıkalyq Brent markaly munaıdyń barreli dúısenbide $55,18 (-0,5%) boldy. Ótken demalys kúnderi OPEK-tiń munaı óndirisin tómendetý týraly kelisimin oryndaý boıynsha baqylaýshy komıssııanyń otyrysynda bul jumystar 80%-ǵa aıaqtalǵany anyqtaldy. Naryq mundaı jańalyqty baıypty qabyldady. Sebebi bul naryqtyq boljamdarǵa saı keldi. Sol sebepti de barrel quny 55 dollardan tómen túspeı otyr", - dedi Bodrova.
Sarapshynyń eske salyp ótkenindeı, ótken jumada AQSh prezıdenti qyzmetine kirisken Donald Tramp OPEK is-qımylynan erikti energetıkalyq avtonomııany qurýǵa nıetti ekendigin jáne ishki munaı óndirisin ulǵaıtatynyn málim etti.
"Sarapshylardyń bul málimdemege qatysty pikiri ekige jaryldy: keıbir sarapshylar bul jospar tym asry silteýshilik dep baǵalasa, ekinshileri bunyń iske asa bastaǵanyn alǵa tartady. Qalaı desek te, AQSh energetıkalyq naryqta óte myqty oıynshy bolyp sanalady jáne OPEK kelisimine qol qoımaǵandyqtan, jeke ustanymǵa ıe memleket", - dedi sarapshy.
