Sarapshy 2030 jyly qazaqstandyqtardyń sany qansha bolatyndyǵyn aıtty
ASTANA. QazAqparat - Bul týraly Májilistegi parlamenttik tyńdaýda Jumyspen qamtý salasyndaǵy ulttyq sarapshy Jaqsybek Kúlekeev aldaǵy 12 jylda Qazaqstan halqynyń ósimi boıynsha derekterdi jarııa etti, dep habarlaıdy QazAqparat.
«Boljamdar belgili bir jaǵdaılarǵa súıenip jasalatyny sizderge belgili. Bizdiń de osy 2031 jylǵa deıingi boljaýymyz tıisti jaǵdaılardy eskerip, júzege asyryldy. Birinshiden, sońǵy 15 jyldy elimizdegi halyqtyń ósý qarqyny jaman bolǵan joq. Jalpy, halyqtyń ortasha jyldyq ósimi 1,2-ni qurady. Soǵan sebep bolǵan elimizdegi jalpy halyqtyń tabıǵı ósimi, ıaǵnı 2001 jylmen salystyrǵanda sońǵy kezderi 3 esege deıin óskeniniń arqasynda bolyp otyr. Ekinshiden, Qazaqstan óńirlerindegi halyqtyń ósý qarqyny ártúrli boldy. Mysaly, eń joǵary ósim Astana qalasynda baıqaldy. Mańǵystaý óńirinde de ońtaıly qarqyn bar. Bul jerlerde halyqtyń sany 15 jylda 2 eseden joǵary kórsetkishti kórsetti», - dedi Kúlekeev.
Sonymen qatar, ol Qazaqstannyń ońtústik aımaqtarynda da halyqtyq ósý kórsetkishi jaqsy ekenin tilge tıek etti.
«Tıisti sebepterdi eskere otyryp, 2030 jyly halyqtyń sany 20 mln 560 myńǵa jetýi múmkin. Bul turǵyda Soltústik Qazaqstan men Qostanaı oblystarynda bul kezeńde de halyqtyń azaıýy jalǵasa beretinin baıqaımyz. Munymen qosa, 2030 jylǵa deıingi merzimde Shymkent qalasy men Astana qalasynda halyqtyń qarqyndy ósýi baıqalmaq. Mańǵystaý men Atyraý oblysynda da halyq sanynyń ósýi óte joǵary deńgeıde bolady. Keıbir óńirlerde sonyń ishinde Reseımen shekaralas aımaqtarda halyqtyń ósýi kóńildegideı bolmaıdy. Atap ótkenimdeı, Soltústik Qazaqstan oblysynda ósý baıqalmaıdy», - dedi Jaqsybek Kúlekeev.
