Sarapshy 2025 jylǵa qaraı munaı ónimderin eń kóp tutynatyn elderdi atady
«Qazirgi ýaqytta álem boıynsha munaı qorynyń 33 paıyzy - Taıaý Shyǵysta, 20 paıyzy - Soltústik Amerıkada, 13 paıyzy - TMD elderinde, 10 paıyzy - Afrıkada, 7 paıyzy - Ońtústik Amerıkada, 4 paıyzy - Eýropada shoǵyrlanǵan. Óz aımaqtary boıynsha Ázerbaıjan men Qazaqstan munaıdyń iri eksporshylary retinde pozıtsııasyn saqtap otyr. Shıki munaıdy qabyldaıtyn basty aımaq – Eýropa elderi. Bul rette Qazaqstannyń belsendiligin erekshe atap ótý kerek. Óziniń geografııalyq artyqshylyǵyn paıdalana otyryp, Qazaqstan batysynda - Kaspıı teńizi, shyǵysynda - Qytaı arqyly munaı eksportyn arttyrýdy kózdeıdi», - dedi Radj Shehar elordada ótip jatqan «Ortalyq Azııadaǵy munaı óńdeý men munaı hımııasy» atty halyqaralyq konferentsııada.
«GlobalData» kompanııasy ókiliniń aıtýynsha, munaı ónimderin tutyný jaǵynan 2019 jyly AQSh kósh basynda turǵanymen, 2025 jylǵa qaraı Qytaı naryqtyń eń úlken úlesine ıe bolady.
«Qytaı men Úndistannyń keleshekte munaı ónimderine degen suranysy arta beredi. Ózderińiz biletindeı, balamaly energııa kózderin izdeý, otyn men qaldyqtardy shyǵarý boıynsha standarttardy engizý, qysqa jáne uzaq merzimde suranys ósimin shekteý máseleleri bar. Áıtse de, motor maıy, benzın, dızel otyny, sondaı-aq, tómendetilgen munaı-gaz - negizgi suranystyń basty faktorlary retinde qala beredi», - dedi ol.
Radj Shehar Ortalyq Azııada munaı ónimderine suranys 30 paıyzǵa artqanyn aıtady. Sarapshynyń oıynsha, bul tendentsııa áli saqtalady.
«Ortalyq Azııa elderindegi munaı óńdeý zaýyttarynyń qýattylyǵyn arttyrý ishki naryqtyń suranysyn qamtamasyz etýge múmkindik beredi. Aımaq muhıtpen shektesip jatqan joq. Sol sebepti, tabysty tek eksportty arttyrýmen ǵana kóbeıtýge bolady», - dedi «GlobalData» kompanııasynyń munaı jáne gaz baǵyty boıynsha dırektory.
