Sarapshylardyń boljamy boıynsha Qazaqstandaǵy ınflıatsııa men bazalyq mólsherleme ósedi
ASTANA. KAZINFORM — Qazaqstan Ulttyq Banki sarapshylar qaýymdastyǵy arasynda júrgizilgen kezekti makroekonomıkalyq saýalnamanyń nátıjesin jarııalady.
Brent markaly munaıdyń baǵasy, Qazaqstan ekonomıkasynyń ósýi, ınflıatsııa, bazalyq mólsherleme, taýarlar men qyzmetterdiń eksporty jáne ımporty, sondaı-aq teńge baǵamy – saýalnamanyń negizgi parametri boldy.
Munaı baǵasy men ekonomıkanyń ósýi
Munaı baǵasy boıynsha stsenarıı sharttary barlyq boljamdy kezeńde tómendedi. 2025 jyly Brent markaly munaıdyń baǵasy 1 barrel úshin orta eseppen 69 AQSh dollary deńgeıinde, al 2026 jáne 2027 jyldary tıisinshe 64,7 jáne 65,6 AQSh dollary deńgeıinde bolady dep kútiledi.
Degenmen, Qazaqstan ekonomıkasynyń ósýine qatysty boljamdar jaqsaryp otyr: 2025 jylǵa JІÓ ósýine qatysty boljam – 5,2%-dan 5,6%-ǵa, 2026 jylǵa – 4,7%-dan 4,8%-ǵa, 2027 jylǵa – 4,4%-dan 4,8%-ǵa ósti.
Inflıatsııa men bazalyq mólsherleme
Sarapshylar ınflıatsııaǵa qatysty boljamdaryn ósý jaǵyna qaıta qarady. 2025 jylǵa jasalǵan boljamdardyń medıanasy 11,3%-dan 12%-ǵa, 2026 jylǵa – 9,5%-dan 10%-ǵa, 2027 jylǵa – 6,5%-dan 7%-ǵa deıin kóterildi.
Inflıatsııaǵa qatysty boljamdardyń ósýine baılanysty respondentter búkil boljamdyq kezeńde bazalyq mólsherleme joǵary bolady dep kútedi. 2025 jylǵa boljamdardyń medıanasy 16,5%-dan 16,6%-ǵa deıin, 2026 jylǵa – 14,3%-dan 14,8%-ǵa deıin, 2027 jylǵa – 11,3%-dan 12%-ǵa deıin sál ósti.
Saýalnamaǵa qatysýshylardyń quramy týraly
Saýalnamaǵa Qazaqstannyń makroekonomıkalyq kórsetkishterin taldap, boljaýmen aınalysatyn 16 uıym qatysty. Respondentterdiń qataryna naryqtyń kásibı qatysýshylary, zertteý ınstıtýttary, halyqaralyq uıymdar men reıtıngtik agenttikter kiredi.
Makroekonomıkalyq saýalnamaǵa Ulttyq Bank boljamdary kirmeıtinin atap ótemiz. Ol qazaqstandyq jáne álemdik naryqtaǵy jaǵdaıdyń damýyna qatysty naryqtaǵy kásibı qatysýshylardyń táýelsiz pikirine, baǵalaýyna jáne kútýine jasalǵan sholýdan turady.
Aıta keteıik, Ulttyq Bank qazan aıynda bazalyq mólsherlemeni kóterý múmkindigi qarastyrylatynyn aıtqan edi.