Sarapshylardy irikteýdiń jańa kezeńi: pedagogter oqýlyqtardy saraptaýǵa shaqyrylady

ASTANA. KAZINFORM — QR Oqý-aǵartý mınıstrliginiń Respýblıkalyq ǵylymı-praktıkalyq bilim mazmunyn saraptaý ortalyǵy oqýlyqtardy saraptaý salasynda jumys isteý úshin pedagog-sarapshylardy irikteýdiń jańa kezeńi bastalǵanyn habarlady.

Vedomstvonyń málimetinshe, barlyq rásimder onlaın formatta E-EXPERT.GOV.KZ platformasynda ótkiziledi. Bul úmitkerlerge eldiń kez kelgen óńirinen qatysýǵa teń múmkindik beredi.

Búginde ortalyqtyń bazasynda oqytý men baıqaý kezeńderinen jańa format boıynsha sátti ótken 400-den astam sarapshy tirkelgen.

E-EXPERT.GOV.KZ platformasy qujattardy tekserýden bastap testileý, áńgimelesý, esse jazý, modýldik oqytý jáne qorytyndy sertıfıkattaýǵa deıingi negizgi úderisterdi avtomattandyrdy.

— Platformany engizý — irikteý úderisin barynsha ashyq ári yńǵaıly etýge múmkindik berdi. Búginde biz sarapshylar qaýymdastyǵyn tıimdi qalyptastyryp, pedagogterdi irikteý sapasyn qamtamasyz etip otyrmyz, — dep atap ótti ortalyq dırektory Nazıra Abdrahmanova.

Ortalyq elimizdiń barlyq óńirindegi pedagogterdi baıqaý irikteýine qatysyp, Qazaqstandaǵy orta bilim sapasyn qalyptastyratyn kásibı qaýymdastyqtyń bir bóligi bolýǵa shaqyrady.

Buǵan deıin habarlanǵandaı, elde 232 jańa mektep salynyp jatyr, bilim sapasy artyp keledi.